Så mange flytta frå Kvinnherad – og til

Tal som no er tilgjengelege viser at det i åra 2000 til 2019 flytta 560 fleire personar i frå Kvinnherad enn det flytta inn.

Denne saka er ein del av «Den store folkevandringa», eit samarbeidsprosjekt mellom lokalaviser organisert i Landslaget for lokalaviser (LLA), Senter for undersøkende journalistikk (SUJO) og NRK.

Bergen, utlandet og Stord er gjengangarane når ein ser flyttemønstera i databasen som måndag morgon vart gjort offentlege for mellom anna medlemsavisene i LLA.

På overordna nivå er 8006 personar flytta frå Kvinnherad i åra 2000 til 2019. 7466 har flytta til Kvinnherad.

Utlandet bergar oss

Innvandringa til Kvinnherad frå utlandet står for heile 1563 personar. Statistikken skil denne gruppa i tre; norske statsborgarar som returnerer til Norge i ei undergruppe, borgarar frå EU/EØS, USA, Canada, Australia og New Zealand i ei annan og resten av verda i ei tredje gruppe.

Norske statsborgarar utgjer berre 130 av desse, medan innvandrarar frå andre land utgjer over 1400. I den same 20-årsperioden har 660 personar flytta frå Kvinnherad og til utlandet. Det betyr ei netto innvandring på 900 frå utlandet.

Bergen og Stord

Ein trend som mange har rapportert om i «Den store folkevandringa» er stor til- og fråflytting frå næraste storby og næraste regionsenter. For Kvinnherad er det i denne samanhengen Bergen og Stord som toppar statistikken i så måte.

1990 har flytta til Bergen i desse åra, medan 1360 har flytta andre vegen. 432 har flytta frå Stord til Kvinnherad, medan 611 har gjort stordabuar av seg.