Rysta etter hærverk: – Me føler oss litt makteslause

I det nyoppussa overbygde uteområdet mellom Restaurant Fiolen og Kafé Hylleblomen hadde nokon forsøkt å setja fyr på eit av borda.

– Me har hatt trøbbel her ei stund, men no har dei gått over streken. Alle fire hjørna er forsøkt sett fyr på, og eg fryktar for kva som kunne ha skjedd dersom det hadde teke skikkeleg fyr. Her er det tett busetnad og det er naboar på begge sider, fortel eigar og drivar Elin Enes tydeleg oppskaka etter hendinga.

– I og med at me hatt problem her tidlegare også, så valte me til slutt å setja opp skilt om tilgang forbode etter stenging. Det sat litt langt inne å setja opp skilta også, for det kjennest uvenleg og eg vil jo helst å leva i ei «happy» verd der alle kan ha det fint. Men til slutt vart det litt for mykje trøbbel. Dessverre hjelpte ikkje skilta så mykje, legg ho til.

Kjedeleg konsekvens

Enes vil understreka at ho mistenkjer at det nok mest handlar om tankeløyse, samtidig må ho innrømme at ho no ikkje veit heilt kva dei skal gjera.

– Det er jo ikkje så lett å lukka og låsa her heller. Me føler oss litt makteslause og redde, ikkje minst vil eg at naboane skal sleppa å vera redde for at noko kan skje. Eg håpar at folk snakkar med ungdomane sine og forhåpentlegvis vekkjer ein tanke hjå dei om kva som kan skje både når ein øydelegg for andre, men ikkje minst om brannfare, understrekar Enes.

– I utgangspunktet ynskte me at folk skulle kunne bruka plassen her utanom stengjetid også, så lenge dei ryddar etter seg og haldt staden fin. Me har også sett litt gjennom fingrane med at folk kjøper mat på Spar og set seg ned for å eta. Men heretter kjem me til å bli strengare, og det er ein kjedeleg konsekvens av det heile, poengterer ho avslutningsvis, før ho måtte skunda seg tilbake til kjøkenet for å steika fleire bollar før opning.