Rusten fekk avslag

Rosendal Utbygging AS ved Geir Rusten ynskjer å utvida bustadprosjektet i Rosendal sentrum med to bueiningar. Men forvaltningskomiteen vil ikkje gje dispensasjon frå reguleringsplanen.

Dei fem leilegheitene som Rosendal Utbygging AS har sett opp der Fonnafly sin hangar tidlegare stod, er på det næraste ferdige. Selskapet eig også tomta på innsida, og søkte i fjor haust om dispensasjon frå reguleringsplanen, slik at dei kan føra opp ytterlegare to husvære. Administrasjonen innstilte negativt, noko forvaltningskomiteen støtta. Geir Rusten sendte inn klage, og då bestemte politikarane å arrangera synfaring.

Den vart gjennomført onsdag ettermiddag. Seksjonsleiar Anbjørn Høivik innleia med å fortelja at tomta er regulert til næring og fellesområde.

– Rådmannen finn ikkje at grunngjevinga for klagen bør føra til dispensasjon, heller tvert imot. Rådmannen meiner bestemt at tiltaket må gjennomførast etter ei endring av reguleringsplanen, ikkje som dispensasjon. I sentrumsområda er det ekstra viktig å ha føreseielege tilhøve. Ein dispensasjon vil vera eit vanskeleggjerande element i resten av planen si levetid, argumenterte han.

 

Draumeverd

Så fekk ein ganske engasjert Geir Rusten ordet. Han var sterkt kritisk til administrasjonen.

– Rådmannen i Kvinnherad har ikkje vore her nede i det heile. Eg fekk nesten bakoversveis då eg såg innstillinga. Plankontoret i kommunen gjer alt rett for at ikkje noko skal skje. Administrasjonen lever i ei draumeverd, meldte han.

Han la til at bustadprosjektet er blitt kraftig forseinka på grunn av den manglande dispensasjonen. I tillegg har han tapt mykje pengar, og understreka at han aldri hadde kjøpt tilleggsarealet dersom han hadde visst at han ikkje ville få byggjeløyve. Avstanden til kaien på sida såg han ikkje noko problematisk ved.

– Reguleringsplanen seier klart ifrå om at det er lov å byggja vegg i vegg. Fire meter fell difor på si eiga urimelegheit. Det er ikkje bygd noko ved sjøen i Rosendal sentrum sidan 2. verdskrig, utanom Folgefonnsenteret. Eg er pensjonist, men eg vil det skal skje noko i kommunen vår, enten det er i Høylandsbygd eller i Rosendal, sa Geir Rusten.

Komitéleiar Øyvind Utne (H) fann å påpeika at Rusten gjekk litt langt i kritikken av administrasjonen. Deretter gav han ordet til dei frammøtte naboane.

– Det skal vera fire meter, det er ikkje snakk om noko anna, sa Knut Vik som bygslar kaien.

– Det er firemetersgrensa som gjeld, men eitt husvære til er greitt, meinte grunneigar Torkjell Nerhus

Kjell Høyland representerte Rosendal Bryggje AS, som har planar om å byggja 18 leilegheiter på den gamle Kopen-tomta rett bakom.

– Utbygging her vil ta ein god del av utsikten frå 1. etasjen vår, frykta han.

 

Lettare

Nokre timar seinare var det klart for det formelle møtet i forvaltningskomiteen. Då var Kai Morten Torget (Frp) fyrstemann til å ta ordet.

– Eg ser ikkje veldig store problem med at han får dispensasjon og får byggja vidare. Det vil gje området eit finare estetisk preg og betre heilskap, sa han.

Øyvind Utne kom til motsett konklusjon.

– Hadde han søkt om éi eining, så hadde det vore lettare å gje dispensasjon. Men han har søkt om to, og då må vi støtta administrasjonen si innstilling, og be han fyra i gang ein reguleringsprosess. Vi var ganske konsekvente med naboen på andre sida, Eivind Pedersen, som òg søkte om dispensasjon, men då sa komiteen tvert nei, vurderte han.

 

Framgangsmåten

Om firemetersgrensa gjeld eller ikkje, vart så eit tema. Kai Morten Torget meinte grensa ikkje gjeld, sidan området er regulert til sentrumsføremål. Men på direkte spørsmål kunne ikkje administrasjonen gje eit eintydig svar.

– Eg kom på synfaringa med den innstillinga at han burde få byggja, men eg er ikkje fortruleg med framgangsmåten til Geir Rusten. Det vil vera ein fordel med reguleringsplan, sa Clara Hveem (Sp).

Med seks mot to røyster gav komiteen ikkje dispensasjon frå planen. Geir Rusten kan då enten klaga, gå i gang med å laga ny reguleringsplan, eller søkja om å byggja eitt husvære i staden for to.