Russetida kosta presidenten iallfall 12.000

Maud Celia Førland har kort tid att som russepresident, og har gjort ei overslag over kva russetida har kosta i kroner og øre.

Det står att ein munnleg eksamen før russepresident Maud Celia Førland abdiserer frå posisjonen sin. På oppløpssida av russetilværet kan ho gjera opp rekneskap på kva feiringa har kosta i kroner og øre.

– Me byrja ganske tidleg, med sal av toalettpapir og tørkerullar, og tente gode pengar på det. Gruppa var gjorde forskjellige dugnader, alt frå rydding i hagar til vakt på konsertar. Folk ønskjer hjelp, det er ein grunn til at me fekk så mange oppdrag, meiner Maud.

Gruppa hennar fekk inn rundt 80.000 kroner på sine dugnader.

Kjøpte brukt

Ho meiner det kom godt med å ha pengebufferen frå dugnadane i bakhand.

– Det blei i hovudsak brukt på gruppa vår, og på hotellovernatting i samband med russetreffet i Kongeparken. Russerevyen gav oss inntekter som gjorde at me kunne ha ei russetid i lag. Det er dyrt å vera russ, og det er dyrt å få ting til saman som kull, slår Maud fast.

Rosendaljenta trur ho kanskje er blant dei som har brukt minst på sjølve russetida.

– Eg har rekna litt på det i dag. Eg var bevisst på å kjøpa mykje brukt. Likevel brukte eg sikkert 12.000 kroner sjølv, når eg held alkohol utanfor og det som me brukte av gruppa sine pengar, seier Maud.

Ho seier russen merkar godt at alt har blitt dyrare.

– Bussen som tok oss til og frå landstreffet kosta 40.000 kroner, til dømes.

I neste veker er det munnleg eksamen for årets russ. Presidenten sjølv skal byta ut russeuniforma med uniforma til sjøforsvaret, og mønstrar på for konge og fedreland 24. juli.

– Eg skal ikkje ha sommarjobb i år, og skal heller pleia familien, meg sjølv og slappa av denne sommaren. Eg er litt lei no, så det skal godt å bli ferdig, sluttar 19-åringen.