Russen øver døgnet på tamp for å bli klare

Revysjefane Storm Uppheim og Isak Rønstad Mo er to av dei rundt 50 avgangselevane ved Kvinnherad vidaregåande skule som no puttar alt av ledig tid inn i revyførebuingar.

Eit tynt dokumentert rykte skal ha det til at 2023 er ein av dei beste russekulla som har vore i Kvinnherad. Då må det vel også leverast ein legendarisk russerevy?

– Me satsar på det!

30 nummer

Revyensemblet består av over 50 russ, sjølv om ikkje alle er like mykje på scenen.

– Me kan ikkje avsløra for mykje av innhaldet, men me gler oss stort, seier dei to spente revysjefane.

Måndag ettermiddag var 370 av 438 billettar selt til premieren. Framsyninga på laurdag er det det langt meir ledige sete til.

– Showa blir like bra begge kveldane, sjølv om det kanskje blir kjekkare for oss på fredagen, med større publikum, vedgår Storm.

– Samtidig kan det henda at showet på laurdag blir endå betre, for då har me ei skikkeleg gjennomkøyring under beltet, legg han til.

Det er tett på 30 ulike nummer som skal framførast i løpet av den halvanna timen revyen varer. Alt er produsert av russen sjølv.

– Først hadde me litt få nummer, no har me kanskje litt for mange, undrar Isak.

Mykje øving

Duoen har for så vidt hovudansvaret, men ansvaret for dei ulike sketsjane er delegert ut. Det kjem vel med, for Isak og Storm kan ikkje vera med på alt, sjølv om revysjefane er mykje på scenen. I tillegg til sketsjar, dansenummer og songar, har russen også laga filmsnuttar som kjem til å knyta saman framsyninga.

Revyen heiter «Keeping up with KVV», som ikkje berre skal få ein til å tenka på Kardashian-klanen, men som også ymtar litt om at det kan ventast ein lærarsketsj eller tre.

– Det må alltid til, erklærer Isak.

Det blir ei hektisk veke, kan dei fortelja.

– Me prøver å jobba effektivt, og har stramma inn litt, slik at me kjem kjapt i gang på ettermiddagane. Då blir det å starta frå byrjinga og gå gjennom revyen. Det er skule, revyøving og soving som det er tid til denne veka. Alle går rett hit til kulturhuset etterpå, og så er det å øva til åtte-ni-ti-tida på kvelden, forklarer revysjefane.

– Er det noko foreldre og besteforeldre skal tenka på før dei kjem på revyen?

– Dei må tenka på at alt me gjer er berre tull! Me spelar ei rolle på scenen her. Det kan vera ting her me ikkje ville gjort til vanleg, seier gutane på forklarande vis.

Sjølv om tida er knapp, ser dei fram til premieren og laurdagsframsyninga.

– Me gler oss til å få visa det fram. Alle må koma, oppmodar Isak og Storm.