Russegruppa Bocazas gjorde koronatestdugnad

Denne torsdagen var det fullt trøkk på vaksinering i Rosendal Samfunnshus. I foajeen blei vaksinemottakarane registrerte, og deretter losa inn til salen for å få sprøyta i armen.

Inne på kjøkkenet var det også koronarelatert arbeid i sving. Under kunnig oppsyn av ekspertane i testteamet vart hurtigtestane til Kvinnherad effektivt pakka om. Fempakningane frå leverandøren vart opna, og jentene dundra gjennom eskene med testar i høgt tempo. Dei sorterte og fordelte i posar med to testar i kvar, inkludert alle turvande delar og instruksjonar.

– Dei har laga til over 1000 posar til no i dag. Det går unna med det no, kunne Janne Hjønnevåg i testteamet fortelja.

Kortare opningstider

Dei nye retningslinjene seier at dei som no får testar er dei med symptom, dei som er nærkontaktar og for husstandsmedlemmer.

– Du kan ikkje henta deg testar berre fordi ungdommen i huset er komen heim frå studiestaden sin, og du vera på sikre sida, sjølv om studenten er sympotmfri. Den ordninga er det slutt på no, fordi det byrjar å minka på testar nasjonalt, eksemplifiserer Hjønnevåg.

– Me er plikta til å dela med andre om ein har til overs. Då me hadde stort utbrot her i Kvinnherad, fekk me testar frå blant anna Kvam og Voss, som me i testteamet køyrte rundt og henta. Plutseleg er det me som må dela, forklarer ho.

No er det korte tider for å henta ut testar. Ved helsesentera er det frå åtte til ti, og på legevakta ti til fjorten.

– Det er ikkje lengre ope for henting, for då vart det så mange som hamstra. Andre stader må du på teststasjonen for å henta, eller kjøpa på apoteket, påpeikar Hjønnevåg, før ho legg til

– Nett no er det veldig fredeleg i Kvinnherad. Heldigvis.

Russegruppa

Lene Omvik Furdal, Helene Skjelnes Vågen, Saima Døssland, Ina Tveito Sandvik, Ella Hjønnevåg, Thea Larsen og Julie Riise gav jernet under dei fire timane. Emma Heggøy deltok også, men var ikkje til stades då Grenda var innom og forstyrra.

– Me tar me ei økt til med ompakking, om det trengs, seier dei.

For jentene i Bocazas 2022 er det også litt fredeleg om dagen. Enn så lenge.

– Russetida er ikkje heilt i gang enno. Men ein me startar opp no, og me har russebil klar. Inntektene frå dette arbeidet går til bensin til russebilen. Me leiger inn sjåfør til å køyra når det trengs. Det er berre å søkja om du vil ha jobben, ler jentene som i god tradisjon har eigen russelåt, som du kan høyra på spotify.