Rundt 7000 høyringssvar til REPowerEU-planen
22. august gjekk høyringsfristen vedrørande forslag til endringar i fornybardirektivet, energieffektiviseringsdirektivet og bygningsenergidirektivet ut.
Publisert
Sist oppdatert
Aksjonsgruppa Nei til Vindkraft i Kvinnherad er blant aktørane som har mobilisert og oppmoda folk om å engasjera seg i saka.
Kommunikasjonsrådgjevar ved Olje- og energidepartementet, Ingrid L. Rogstad, fortel at dei framleis tel.
Annonse
«Vi jobbar framleis med å registrere svara, så det eksakte talet er ikkje klart ennå, men det har kome inn ca. 7000 svar», skriv ho i ein e-post til Grenda.
I høyringssvara som har kome frå kvinnheringar er det mellom anna retta kritikk mot naturøydeleggingar, mot kven som skal kontrollera landområde og likeins kritikk mot at underlagsdokumenta ikkje var tilgjengelege på norsk. At høyringsfristen har vore kort og midt i sommarferien er også ein gjengangar blant svara.
Eg er sterkt i mot vindkraft på land. Øydelegging av natur og dyreliv. Naturen er bare til låns. (Høyringssvar frå kvinnhering)
Uroa for Kvinnherad-naturen
Kvinnherad Industri- og Næringsparti - INP er blant dei som har nytta seg av retten til å uttala seg i saka. Dei er blant aktørane som meiner at høyringsfristen ikkje har vore lang nok.
Annonse
– Det er ikkje bra for eit demokrati med så korte høgringfristar og midt i sommarferien. Ein kunne nesten tru at regjeringa jobbar for EU og ikkje det norske folket. Alle dokumenta må omsetjast til norsk, slik at det blir høve for folk å setja seg inn i saka, skriv dei i det første av totalt seks fyldige punkt.
Vidare peikar dei på at ein stor del av den moglege vasskrafta i kommunen allereie er bygd ut, og dei stiller seg kritiske til at Kvinnherad skal ofra meir av naturen sin til vindkraftproduksjon.
– Her i Kvinnherad kommune er over 90% av mogleg vasskraft utbygd. To forskjellige kommunestyre har vedteke at vi ikkje skal ha vindkraft i kommunen, fordi vi har gitt nok natur til fellesskapet. No kjennest det som at lokaldemokratiet står i fare, og at lokalpolitikarane ikkje skal få bestemma lenger.
Høyringssvaret frå Kvinnherad INP er signert Gunnar Helleland, Jostein Rødland, Ragnhild Tvedt.
Dei har såleis bidrege til at Olje- og energidepartementet har rundt 7000 høyringssvar å gå gjennom og ta omsyn til i den vidare prosessen.
Fjella i Kvinnherad er utbygde med vasskraft. Statkraft og SKL har bygd ut store områder i fjella våre og i tillegg har det vore storstilt utbygging av småkraftverk. Dyre- og fuglelivet tåler ikkje fleire naturøydeleggingar. Mange artar er i ferd med å verta utrydda og kan ikkje bli utsett for fleire påkjenningar. Store deler av områda rundt er mykje nytta som rekreasjonsområde både sommar og vinter og er mykje verd for folk si helse. Dette er nokre av grunnane til eg ikkje kan akseptera ei utbygging av vindmøller i kommunen vår. (Høyringssvar frå kvinnhering)
Eigna område
Annonse
REPowerEU-planen fremjer forslag som gjer det mogleg å redusera saksbehandlingstida for vindkraft på land og til halvs, solkraft og andre fornybare energikjelder.
Ein av grunnane til at Kvinnherad har mobilisert er at Kvinnheradfjella vart peikt ut blant dei særskilt eigna områda i nasjonal rammeplan i 2019.
Som eit allereie utpeikt område, er Nei til Vindkraft i Kvinnherad, med fleire, uroa for at kortare behandlingstid i saker om utbygging av vindkraft igjen kan føra til at den lokale råderetten kan bli svekka.
REPowerEU-planen
Konklusjonen som i planen som no er i prosess, seier følgjande:
Tida er inne for å redusera den strategiske energiavhengigheita til Europa. REPowerEU ynskjer å akselerera diversifisering og fleire fornybare gassar, og å leggja til rette for energisparing og elektrifisering med potensiale til å snarast mogleg levera energi tilsvarande det fossile brenselet som Europa per i dag årleg importerer frå Russland. (...)
Annonse
Det hastar å redusera Europa sin energiavhengigheit: Klimakrisa, som er alvorleg forsterka av Russland sin krigføring mot Ukraina, og EU sin avhengigheit av fossilt brensel blir av Russland utnytta som eit økonomisk og politisk våpen.
Det grøne skiftet vil styrka Europas økonomiske vekst og industrielle leiarskap, samt bidra på vegen mot eit klimanøytralt Europa innan 2050.
