Rumpene i Rosendal
I førre veke gjekk startskotet på denne nye stadnamnserien. Då gjekk turen til Holmedal og Indre Matre. I dag skal me til Rosendal, for her kan ein finne mangt og mykje til nokon og ein kvar.
På denne turen er det viktig å finna fram barnet i seg. Om du ikkje finn det i deg sjølv, har du kanskje eigne barn du kan ta med på tur, eller kanskje kan du låne nokre av nokon andre?
Ekspressiv betyding
Annonse
For dersom du spør om borna vil vera med på tur til Rumpo, Revarumpo eller Padderevo, så kan eg garantera at dei i det minste vil verta nyfikne. De kan ta dykk ein vakker sundagstur med god niste i sekken og stikka innom alle tre.
Men kanskje er du ein av dei som tykkjer det er innmari kjekt å gå på tur, og skulle gjerne ha gått litt lenger. Då kan eg med glede dele at det også er mogeleg gå vidare opp til Brennevinsrumpo. Men den turen passar kanskje best for dei litt meir erfarne turgåarane.
Utifrå kjeldene eg har brukt gjennom Johan Feet og lokalnamn.no, så er forklaringa på desse noko spesielle namna heller mangelfulle. Rumpo blir beskrive som eit smalt utmarksstykke, på Revarumpo står det «smal utmarksteig» medan Padderevo vert beskrive som eit «lite berg». Staden Brennevinsrumpo kjem derimot med ein kjapp forklaring, «Smal lang teig som skifta eigar for ei flaska brennevin».
Litt humor?
Annonse
I fylgje NAOB, Det Norske Akademis Ordbok, er etymologien til ordet «rumpe» noko uviss. Det står der at grunntydinga mogelegvis kan vera «bakende» jamfør tysk «Rumpf», engelsk «Rump» eller ei ekspressiv betyding av ein tjukk krum gjenstand.
Ein kan jo berre spekulera. Kanskje hadde dei litt humor i gamledagar også? Kanskje er det nokon som ein gong berre ville vera litt morosame, og valde å samanlikna dei smale jordstykka med den smale delen av baken?
Dersom du skulle sitje på noko meir informasjon om nokre av desse stadene, så er det fritt fram for å ta kontakt.
På attsyn!
