Røykelaks-eventyret til Kloster Laks held fram

Jula 2020 bestemte Rune Eide i seg for å gjera alvor av hobbyen sin, og starta då opp med produksjon av røykelaks heime i garasjen på Halsnøy, og den vesle familiebedrifta har verkeleg fått luft under vengene.

Det er ikkje mykje som liknar på ein garasje lenger, ettersom han har lagt Epoxy-golv og installert fleire rustfrie stålbenkar etter krav frå Mattilsynet. Dei har godkjent lokala hans som ligg like ved Halsnøy Kloster. Han har også utvida produksjonen til å kunne røyka 1,2 tonn laks i slengen.

Gründeren har tidlegare fortalt Kyst.no at postadressa til familien er faktisk Halsnøy Kloster, og difor valde dei dette namnet på røykelaksen. Eide jobbar offshore i oljenæringa, har sysla med røykelaks på privaten i mange år, og ynskja å produsere meir til vener og familie.

Tilbakemeldingane var gode og etterspurnaden bra, og røykelaksproduksjon i storskala vart difor neste steg tilbake i 2020, saman med sambuar Madeleine.

Det har dei ikkje angra på.

Eksklusiv laks

Halsnøybuen har nyleg unnagjort ein travel periode før jul og nyttår, og fortel at interessa har vore svært stor sidan oppstarten, og mange nye avtalar er inngått.

– Eg røyker vanlegvis laks ein gong kvar friperiode eg er heime frå Nordsjøen, men me aukar alltid produksjonen før jul, då etterspurnaden generelt er større og det kjem inn førespurnadar på firmagåver og liknande, seier halsnøybuen.

Han fortel at dei ynskjer å vera noko utanom det vanlege, og Kloster Laks er blant anna å finna på verdas mest luksuriøse hotell, Burj Al Arab, verdas einaste sjustjerners hotell.

– Me har det siste året jobba med å perfeksjonera røykelaksen til deira ynskje, for i byrjinga tykte dei at den var litt salt. Det har me klart, og første leveransen ned dit var i november 2023. Planen er å utvida til fleire restaurantar og hotell i Dubai, slik at me kan senda meir laks ned med same fly, fortel Eide.

Røykelaksprodusenten har i fleire år hatt Hotell Norge i Bergen som kunde, og jula 2023 ville Scandic Holmenkollen og Farris Bad også ha Kloster Laks på menyen.

Eide har også fått innpass hos den tradisjonsrike og kjente restauranten Caviar Kaspia i Paris, som har laksen på menyen og som sel den i butikken deira.

Ekspanderer

Eide fortel at han og kona reiser mykje rundt til byar der dei ynskjer å ekspandera.

– Me har ein strategi om å få laksen vår ut til eksklusive restaurantar og hotell omkring i verda. Me var blant anna i Dubai og Abu Dhabi i mars 2023 og fekk veldig god respons på røykelaksen. Restaurantsjefar og Michelin-kokkar gav gode tilbakemeldingar på smak og konsistens, den skilde seg ut frå det dei hadde smakt tidlegare, fortel han.

Nyleg var Rune i Monaco der han snakka med kjøkkensjefen til Prins Albert, som likte svært godt smaksprøvane han fekk levert.

– Siste melding frå palasset er at dei ynskjer å bruka røykelaksen vår i selskapssamanhengar.

Rune var òg rundt på fleire flotte restaurantar og hotell i Monaco som ynskte å smaka på laksen, så desse tilboda jobbar han med no.

Storfint besøk

Tidlegare i haust hadde Eide storfint besøk frå kjøkkensjefar som nyttar røykelaksen. Dei fekk ein to-dagars rundtur for å sjå korleis Kloster Laks blir til frå lakseegg til ferdig produkt. Blant anna var kjøkkensjefen frå fotballklubben Manchester City, det norske slottet, Statsråd Lehmkuhl og Magic Hotel Kløverhuset med på omvisinga.

– Fyrste dagen var me innom Inka foredlingsanlegg på Lepsøy og Salmon Eye i Rosendal. Besøket fekk seg ei natt i Rosendal med middag på Gjøa Sjømat, og dagen etter gjekk turen til Kloster Laks på Halsnøy.

Kloster Laks bruker laks av høgaste kvalitet levert av eksportselskapet Seaborn i Bergen. Seaborn får kvalitetslaks frå ulike oppdrett i heile landet, og laksen blir vidareforedla i toppmoderne anlegg hos Inka.