Røssland trer over i ny Herde-rolle

– No styrer me etter same målet. Sidan me er gode på kvar våre ting, gjer me om litt på rollene. Kim blir operasjonell leiar, skal tettare på produksjonen, seier Ovum-leiar Cato Lyngøy om leiarendringa.

Inn som øvste leiar kjem Audun Andreas Dahl, som har vore arbeidande styreleiar i Herde Kompositt.

– Me etablerte og tok over Herde med dei ressursane me hadde, og har heile tida vore klare over våre eigne avgrensingar. Det som skjer no er at eg går no tilbake til det eg kan best og har gjort før, som er å vera tett på produksjonen og prosjekta våre. Me foreslo dette ei god stund før avtalen blei signert, seier Kim Røssland til Grenda.

Riggar for framtida

Det gjekk rundt ni månader frå intensjonsavtalen mellom Herde Kompositt og Ovum vart signert til overtakinga.

– Det har vore ein lang prosess, og ting tar tid i slike prosessar. Det skal gjerast rett, og det var ingen grunn til å forhasta seg. Tanken vår frå starten var at for me skulle veksa, måtte me ha tett samarbeid med oppdragsgjevarane. Ovum har eit behov, vonlegvis å selja mange egg, skal ein selja, så må ein vera sikker på at dei får laga egga, seier Røssland.

Han siktar då til det lukka oppdrettsanlegget Egget, som Ovum har patentert og som Herde Kompositt i 2022 laga prototypen av. Originalegget er no tatt på land hos Herde.

– Det er ein revisjonsstans i Ovum-regi, men me har fått oppdraget med å gjera det. Dei som finjusterer sine ting for optimalisera fiskevelferda, inkludert å skifta noko utstyr, forklarer Røssland.

Herde har eitt Egget til i produksjon, og sluttfører for tida fire Palfinger-livbåtar.

– Me har blitt breie i porteføljen vår, og er ute på verft og tar reperasjonar på snøggbåtar på staden. Me riggar oss til framtida, og har blant anna skifta ut porten i sørenden for å ta ut større komponentar frå hallen, utdjupar Røssland.

Fiskevelferd

Røssland, Lyngøy og Dahl vonar proppen losnar for Egget no.

– Det er mykje som er vår favør no, med større fokus frå regjeringa på fiskevelferd. Lukka oppdrett har blitt meir akutalisert gjennom Stortinget sitt samrøystes vedtak om at ein ynskjer ein retningsendring i norsk oppdrett, der delar av sjøfasen av verdikjeda vert driven i lukka, semilukka eller skjerma teknologi, påpeikar Lyngøy.

Egget er eit slikt lukka anlegg. Vestlandet har gjennom trafikklysordninga for tredje gong fått redusert produksjonskapasitet. Stortingsvedtaket seier at dersom ein går over i lukka teknologi, i praksis lusefri, skal ein få tilbake volumet.

– I den situasjonen så veit me at det blir etterspurnad etter lukka og semilukka anlegg, og då er det tenleg å få hand om produksjonskapasiteten for slike anlegg. Herde er framoverlengte og innovative, og det trengs når ein skal seieprodusera Egget her, legg Lyngøy til.

Utvikla seg

Lyngøy, Dahl og Røssland er tydelege på at Herde skal utvikla seg vidare.

– Det samanfell med det Ovum også skal. Me har hatt eit partnarskap over tid, og er i gang med andre egget. Det er også rett å seia at Herde kan levera mykje anna i dette materialet, så Egget blir berre eitt av beina i den samanheng. Me satsar i lag, seier trioen.

– Korleis blir egglegginga vidare?

– Cato (Lyngøy, journ.merk) har alltid vore i forkant, det er ti år sidan Egget blei unnfanga. Herde ynskjer også å vera i forkant på produksjonsmetodar, kapasitet og løysingar. Me er i ein prosess der, og ser på kva me har gjort og korleis me ynskjer å gjera det i framtida, seier Røssland.

Påtroppande dagleg leiar Audun Andreas Dahl understrekar at lukka oppdrettsanlegg handlar om fiskevelferd.

– Det er fisken som betaler alle rekningane i oppdrettsbransjen, så om ikkje fisken har det bra, så har ikkje bransjen det bra. Bransjen må levera på fisken sine premissar, sluttar Dahl.