Rosendalsveko like om hjørnet

Rosendalsveko, som rett nok berre går over to dagar, er eit samarbeidsprosjekt mellom Folgefonnsenteret, Havforskingsinstituttet og Bjerknessenteret for klimaforsking. Frå måndag 7. til tysdag 8. august kan du få med deg både føredrag og panelsamtalar.

– Fyrste sesjon handlar om klima og natur. Statsråd for Klima- og miljødepartementet Espen Barth Eide skal diskutera saman med, blant andre, forskarar frå UiB på korleis ein kan ha to tankar i hovudet samtidig og kan klara å ta vare på både naturen og klimaet. Korleis kan ein gjere det som er best for miljøet, og samtidig gjere det som er best for naturen? seier dagleg leiar for Folgefonnsenteret Una Kolle.

Tilgjengeleg

Medan konferansen har nye og spanande føredrag og panelsamtalar kvart år, er det nokre av sesjonane som står fast på programmet. Eit av dei handlar om Folgefonna.

– Det blir som ei årleg oppdatering. Me prøver å halda tråden i kva som skjer og sjekkar politikarane si vilje til endring, saman med ei statusoppdatering frå forskarmiljøet og kva dei har å seia, forklarer Kolle.

Den daglege leiaren håpar at konferansen blir ein like stor suksess som dei tidlegare åra, og presiserer at dette er eit arrangementet for alle, ikkje berre forskareliten.

– Det er viktig at det er ope og tilgjengeleg for alle. Eg håpar at det kan vera ein møteplass for å diskutera dei viktige temaa som er relevante for folk generelt, understrekar Kolle.

– Publikum kan også vera med ved å stilla spørsmål. På slutten av kvar panelsamtale vert det opning for spørsmål frå salen, avsluttar ho.

Deltakarar

Av deltakarane elles kan nemnast Kjetil Lund frå NVE, Siri Espedal Kindem frå Equinor, Thor Henrik Hagen frå HYDS, Ragnhild Janbu Fresvik frå Eviny, Lars Haltbrekken frå SV, Sveinung Rotevatn frå Venstre, Liv Kari Eskeland frå Høgre, Helene Ødven frå DNT og Erlend Eide frå Eide Fjordbruk.