Rosendalsveko 2021 er i gang
Måndag føremiddag gjekk startskotet for klimakonferansen Rosendalsveko ved Folgefonnsenteret, som i år vert arrangert for andre gong. Med ein nyleg publisert klimarapport som bakteppe var det stor semje blant opningstalarane om at årets arrangement var særs viktig.
Publisert
Sist oppdatert
Hans Inge Myrvold hadde gleda av å opna Rosendalsveko. Han meinte at klimarapporten som han hadde lese ved frukosten synleggjorde at ein no var på kode raud for menneskeheita, og peika på kor stor utfordring ein no står ovanfor.
– Eg sette morgonkaffien i halsen då eg såg rapporten i dag tidleg, meldte han frå talarstolen.
Annonse
Vidare understreka han kor viktig Rosendalsveko er, med alt det tverrfaglege samarbeidet det initierer. Det å binda folk saman og finne gode løysingar på tvers av kommunegrenser og institusjonar vart fremja som ein fruktbar konsekvens av klimakonferansen.
For Kvinnherad sin del understreka ordføraren kor viktig det var å satsa på berekraftig turisme, eit felt som dei mange Instagrambileta av Bondhusvatnet og den konstruerte fossen i Fjellhaugenvatnet den siste tida har vore med på å setje fokus på.
Før han gav mikrofonen vidare, utfordra han akademia på å legge fram ein Rosendalsrapport i forkant av neste års klimakonferanse.
– Eg gler meg til å kveikja rundt mange viktige tema desse dagane, og det er ei ære å erklæra Rosendalsveko 2021 for opna, avslutta han.
Annonse
– Det vi no ser er skremande
Sissel Rogne, direktør ved Havforskingsinstituttet, snakka om felles ambisjonar innan politikk, næringsliv og akademia då ho overtok mikrofonen. Tematikken for velkomsten var «Kva har skjedd sidan Rosendalsveko 2020?» Rogne svara retorisk på dette spørsmålet i si innleiing.
– Skal ein samanfatte kva som har skjedd det siste året. Ja, det er kanskje blitt vakrare i Rosendal, men også villare og meir utfordrande. Det er skremande det vi no ser, sa ho og sikta til klimaendringane og konsekvensane desse fører med seg.
Noko Rogne trekte fram som særskilt for denne regionen er møtet mellom ferskvatn og saltvatn. Difor såg ho det som særs viktig å forske på kva denne kombinasjonen har å sei for heile økosystemet, samt for mikrosystema i havet.
Ho såg fram til å diskutere problemstillingane rundt endringane i havet dei neste dagane, og understreka at biologien ikkje likar endringar.
Forsking, innovasjon og utdanning
Annonse
Kikki Kleiven, den nye direktøren ved Bjerknessenteret, heldt fram med å belyse konsekvensar av klimaendringane.
– Det ekstreme har blitt meir vanleg, og dette skuldast menneskeleg påverknad. Forskarar er samde om at menneskeskapte klimaendringar påverkar økosystema våre, slo ho fast.
I dag er det ikkje eit spørsmål om klimaendringane skjer, men om kor raskt det går, informerte Kleiven engasjert. Ho la til at ein no har lita tid til å få til ei endring og meinte difor at møtestader som Rosendalsveko er utruleg viktige.
Men det var også viktig å legge til rette for å gjera relevante yrkesfag spanande. For å klare det grøne skiftet meinte Kleiven at ein måtte skape nye arbeidsplassar og tenke strategisk og målretta. Forsking, inovasjon og utdanning var i dette høve ein viktig trio.
Som eit døme til etterfølging trekte ho fram den yrkesfaglege nysatsinga UNITEC Teknologisenter på Rubbestadneset på Bømlo, der det frå 2022 vil bli tilbydd yrkesfag som rettar seg mot havnæring, miljø og fornybar energi.
Programmet gjekk dernest vidare til Kraftdebatten, kor mellom anna Høgre og Arbeiderpartiet fekk lagt fram sine politiske synspunkt på kva som er den riktige vegen mot det grøne skiftet.
Annonse
Rosendalsveko vert live-strøyma på Folgefonnsenteret si Facebookside.
