Rosendalsfjella - no også på fjorden
Med nydekorerte flater la Rødnebåten «Rygerfonn» fredag ettermiddag frå Rosendal kai.
Publisert
Sist oppdatert
Dekoren er fotografi frå Rosendal og Hardanger, og båten har såleis, i tett samarbeid med Rødne, blitt forvandla til flytande reklame for området.
Stuntet er det Visit Rosendal, med Ove Hillesland som initiativtakar, som har stått for. Som ein del av Kvinnherad sine koronamidlar for reiselivstiltak, vart Visit Rosendal i mai 2020 tildelt 100.000 kroner. Pengane har no blitt nytta til å dekorere snøggbåten som går mellom Rosendal og Bergen.
Annonse
Inspirasjonen kjem frå båten som fraktar publikum frå Stavanger til Flor og Fjæra på Sør-Hidle, «Rygerfjord».
– Dei har dekorert båten med skikkeleg flower-power, og eg tenkte det kunne gjerast noko liknande her. Her er det tona ned, med fokus på blåtonar og fotografi frå Rosendalsfjella. Det kan ikkje vera slik at folk i Bergen ikkje veit at denne båten går til Rosendal, seier ein engasjert og nøgd Hillesland frå kaien.
Fotografiet han siktar til er det Stig Are Helle frå Rosendal som har teke.
Stort arbeid å montere storslått natur
Annonse
Jannicke Birkeland og Anne Toppe Myrdal frå Bergensfirmaet A7 Print har nytta tre dagar på jobben, som enno ikkje er heilt ferdig. Folie med fotografi av Baroniet skal nemleg monterast på motsett side av den allereie monterte Trolltunga. Som to av dei mest markante turistmagnetane frå området skal desse bileta bidra til å lokke turistar til å oppsøke dei flotte naturopplevingane Kvinnherad og Hardanger har å by på.
– Det har vore eit stort arbeid, men det har faktisk gått veldig greitt, slår Birkeland og Myrdal fast medan dei stryk den oppvarma folien på plass. Rundt om på kaien ligg det utstyr og papirrullar som vitnar om at dei har holdt på ei stund.
Arbeidet byrja på onsdag, då dei hadde to økter. Torsdag hadde dei også to økter, kor den siste økta vart avslutta klokka to på natta.
– Ove hoppa uti her klokka tolv på natta i går, for å sjå korleis det såg ut på utsida, fortel Myrdal medan kollegaen skjer bort overflødig folie langs båten sine definerte linjer.
– Liten Rosendalsferie
Som Hillesland, har også dei nytta sine svært definerte pausar til å bade, og ser seg heldige som har fått nokre solrike dagar i Rosendal.
Annonse
– Det har vore ei blanding av business og pleasure dette då, undrar eg.
– Ja, det har det absolutt! Vi har nesten fått litt Rosendalsferie, smiler Birkeland og legg til at dei har blitt godt ivaretatt av Rosendal Turisthotell under opphaldet.
Det dei trekkjer fram som det mest utfordrande med arbeidet så langt har vore at dei har måtta ta omsyn til at det er ein rutebåt dei har jobba på. Likeins var det stor usikkerheit om folien ville passa til forma på båten. Veret kunne også blitt ei utfordring, men her var dei som nemnd heldige.
Like før fredagens 14.25-avgong kom Andreas Tvedt og Chris Tønnesen frå mannskapet ut på kaien. Dei meinte resultatet var blitt betre enn venta, og virka ikkje til å kvi seg for å frakte passasjerar mellom Bergen og Rosendal med den nydekorerte katamaranen.
