Rosendal var mellombels kraftsentrum
Una Kolle, dagleg leiar ved Folgefonnsenteret, meinte at kaiområdet i Rosendal var omgjort til eit ekte kraftsentrum under Rosendalsveko.
Publisert
– Det er sterke stemmer som er samla her, kor det nyaste på forskingsfeltet, politikarar og lokalt næringsliv er representert. Dette arrangementet er både utruleg viktig og nyttig, og det er gøy å få vera med å arrangera noko slikt her, sa ho medan konferansen stod på.
Det var ikkje mykje tid til prat som organisator og vert for konferansen, men Kolle - til liks med mange andre - nytta høvet til å trekke fram den ferske klimarapporten som FN la fram måndag morgon.
Annonse
– Rapporten har definitivt understreka kor viktig denne konferansen er, meinte ho.
Før det endelege punktet på programmet vart gjennomført, nemleg lunsj, nytta Kolle høve til å retta si takksemd til alle som hadde vore involverte i gjennomføringa av Rosendalsveko. Takken formidla ho i teltet som var sett opp på kaien.
Grøn og blå gåve i takk
Publikum fekk i same slengen dessutan ein ekstra takk frå Kvinnherad kommune, gjeve av ordføraren.
Annonse
– Sitjeunderlaga de sit på er dykkar til odel og eige, sa Hans Inge Myrvold heilt til sist, og la til at det gledde han at det også blir samling til neste år.
Dei som deltok på avslutningsprogrammet fekk dermed ta med seg dei grøne og blå sitjeunderlaga som gjennom konferansen hadde blitt nytta til å dele forsamlinga inn i to fargekoda kohortar.
