Rosendal Mikrobryggeri i full sving

Med namn som mellom anna «Melderskin» og «Malmangernuten» satsar det nyoppretta mikrobryggeriet på eit sterkt lokalpreg på ølet dei lagar.

Bak det nystarta selskapet Rosendal Mikrobryggeri står venegjengen Kristoffer Hillesland, Andreas Staurheim Engrav, Hege Sofie Eidsheim, Thomas Alexander Kristiansen, Joakim Auflem Fløo og Ida Karoline Blom – ein venegjeng som vanlegvis er busett frå Oslo i aust til Haugesund i vest. Den engasjerte gjengen var i full sving med brygging då underteikna kika innom ein laurdag føremiddag.

– Eitt minutt, Kristoffer!, kjem det frå Andreas Staurheim Engrav.

Når ein bryggjer øl er det visstnok viktig med eksakt tidtaking.

– Korleis kom de opp med tanken om å starte å brygge?

– Vi har lenge vore interesserte i godt øl, og då var det naturleg å etter kvart prøva seg på brygging sjølve, kjem det frå fire av dei som er til stades denne laurdagen.

– Vi har brygga i litt over eitt år her på huset, så vi er relativt nye i bransjen, fortel Thomas Alexander.

Aukar produksjonen

Til no har det ferske bryggeriet brygga fire ulike typar; Indian Pale Ale, American Pale Ale, Farmhouse Ale og American Black Ale.

– Det fyrste vi brygga til oss sjølve smakte mest vatn med ølsmak på, opplyser Kristoffer Hillesland med ein liten grimase over andletet.

Etter kvart som kvaliteten auka og dei rette løyva kom på plass, vart det også mogleg å få kjøpt ølet i baren på hotellet. At gjengen har byrja å få dreis på brygginga, tyder også salet på.

– Lukkelegvis har det gått betre og betre. I starten hadde vi tre sortar for sal, men vi er no utseld for to av dei. Så langt har det vore gode tilbakemeldingar, noko vi set stor pris på, fortel gjengen.

Så langt har produksjonen vore på rundt 90 liter, men gjengen vil no laga meir.

– Vi har ikkje brygga i så store mengder enno, men vi er i ferd med å auke til 4 batcher, altså 120 liter, seier Kristoffer.

– Alt vi tener går inn att i selskapet for slik å kunne forbetre oss, legg Thomas Alexander til.

 

Lokalpreg

Trass i at gjengen er busett på kvar si side av landet, er det ikkje tvil om at lokalpreget står sterkt. Med namn som «Melderskin», «Malmangernuten», «Myrdal» og «Skålagato» på dei ulike øltypane, så er det solid forankring i nærmiljøet, noko som garantert ikkje dempar interessa hjå vitjande.

– Per i dag har vi tilverknadsløyve. Det vil seia at vi har lov til å selje det for konsum på hotellet, fortel Kristoffer, som er son til driverane av Rosendal Turisthotell.

– På sikt håpar vi også på å få salsløyve, legg han til.

I tillegg til å nytta seg av lokale namn på dei ulike typane øl, så tek dei også sikte på å nytta seg av lokale råvarer.

– Vi har dyrka malt og humle her på huset, og håpet er at vi etter kvart kan nytta oss av dette i produksjonen, fortel dei.

– Det er utrulig gode vekstvilkår her, så det ser allereie lovande ut, legg Thomas Alexander til.

Frå vinbar til ølbar

Frå sumaren av vert det oppussing i kjellaren på hotellet. Mellom anna skal bryggeriet flyttast ned frå kjøkenet, kor det står i dag, og til området ved baren nede. Der skal det lagast til glasveggar slik at ein kan sjå inn på det som då vert det nye bryggeriet.

– Vi kan ikkje ha det på kjøkenet når sesongen står på for fult. Det vert det for trongt til, seier Ove Hillesland, eigar av hotellet.

– Det vert nok klart etter sumaren ein gong, og då vil det verta endra profil frå vinbar til ølbar, legg Kristoffer til.

Med gode lokale namn og sterkt engasjement, er det nok godt håp om å få til eit bra sal, spesielt med ein turistsesong som nærmar seg med stormskritt.

– Om det vert bra fart på salet, så er det ein stor bonus. Vi tek det litt som det kjem, avsluttar gjengen.