Rosendal-damene gjer comeback – klart for lokaloppgjer denne sesongen

Etter å ha glimra med sitt fråvær førre sesong, er Rosendal Turnlag tilbake med eit eige damelag i seriesystemet denne sesongen.

– Det kjem opp relativt store og gode grupper med ivrige jenter gjennom ungdomsavdelinga i klubben, og desse treng noko å strekka seg mot. Difor har det vore eit sterkt ynskje frå klubben å få eit damelag på beina igjen, seier Håvard Sætrevik.

J17 er stamma

Sætrevik har saman med Roar Musland takka ja til å trenaransvaret for det nyleg påmeldte damelaget i 5. divisjon. Dei var begge trenarar for fjorårets J17-lag i klubben, og det er denne gjengen som no dannar stamma i damelaget.

– I det laget som spelte J17-fotball i fjor er aldersfordelinga slik at det er mange som ikkje kan spela J17 denne sesongen. Då var det naturleg å ta den gjengen opp og laga eit damelag saman med andre seniorar som har gitt uttrykk for at dei ynskjer eit damelag, seier Sætrevik.

Lokaloppgjer

Dei starta opp med trening i førre veke og har så langt vore ein stad mellom 13 og 15 på treningane så langt.

– Vi ser for oss at vi har eit utgangspunkt på mellom 16 og 20 jenter og damer, og så kan vi låna opp frå J15 om vi ynskjer det, seier damelagstrenaren.

Og sjølv om brorparten av laget ikkje har erfaring frå seniorfotball frå før, ser trenaren allereie progresjon etter eit par treningar i vinter.

– Dei har løfta seg godt i møte med desse vaksne damene som er med å trena. Så det har allereie gitt ein naturleg progresjon å spela saman med desse som har rikeleg med seniorerfaring frå før, seier han.

Sidan Rosendal ikkje meldte på eit damelag i fjor, må Rosendal starta opp i 5. divisjon. Det betyr at vi kan venta oss eit skikkeleg lokaloppgjer i damefotballen denne sesongen. Her kan du sjå kva andre lag Trio og Rosendal skal opp mot denne sesongen:

5. divisjon avd. 02

Arna-Bjørnar 3

Eikelandsfjorden

Norheimsund

Olsvik

Rosendal

Sandviken

Sædalen

Trio

Vadmyra