Rosar COS-kurs for foreldre

I vår har tobarnsmor Eva Abramska tatt del i eit gratis kurs i regi av kommunen si eining for barn og familie, og ho vil tilrå alle foreldre å melda seg på dette kurset.

– Dette kurset er for alle! Det handlar ikkje om å bli ein perfekt forelder, men å få ei ny forståing for barnet, fortel Eva, og smiler oppglødd:

– I gamle dagar tenkte ein gjerne at ungar var «snille» eller «ikkje snille», og at nokon berre ikkje kunne oppføra seg, men no har me ny kunnskap om kva som ligg bak ei åtferd.

Eva har to born, på 3 og 6 år. Då ho vart mamma ville ho læra meir om born og hennar nye rolle som forelder. Så oppdaga ho COS-kurset, og melde seg på. COS står for Circle of Security, og er eit internasjonalt etablert kurs basert på årevis av forsking på born og korleis ein oppnår ei trygg tilknyting.

– Ungane skal utforska verda, men så skal dei alltid kunna koma tilbake til meg for tryggleik, forklarar Eva.

Viktig for psykisk helse

Me pratar med Eva på familiestøtte-kontoret på Husnes, og med oss sit tre kursleiarar som gjerne vil spreia ordet om komande COS-kurs.

– Trygg tilknyting har mykje å seia for barnet si psykiske helse seinare i livet, fortel Siv Karin Stensletten, og Linda Saghaug følgjer opp:

– Det er viktig å hjelpa born med å forstå kjenslene sine. Det skapar tryggleik når me møter kjenslene deira, før me adresserer oppførselen, seier ho.

– Me plar å seia at forelderen skal vera større, sterkare, klokare og god, skyt Anette Huse inn.

Kursleiarane forklarar at forelderen skal vera ein trygg rettleiar for ungane, det er ikkje ungane sine reaksjonar som skal styra ein kvar situasjon. Dette krev stundom tolmodige vaksne. Linda Saghaug smiler:

– Kurset hjelper foreldra å sjå seg sjølv utanfrå og å sjå ungen innanfrå.

Handtera kvardagen

– Det er fort gjort å berre gjenta ei oppseding som ein fekk då ein sjølv var liten, påpeikar Stensletten.

– Men no har me ny kunnskap om born, og ungane veks opp i ei anna verd enn me hadde for 20-30 år sidan, så det kan vera greitt å oppdatera seg litt.

Eva fortel at ho fekk ei arbeidsbok på kurset, med tema som kursdeltakarane reflekterte over. På kvar samling fekk dei også sjå videoar av kvardagssituasjonar, medan ein psykolog gjekk gjennom reaksjonane til både borna og foreldra i videoen.

– Det var veldig interessant. Her fekk me reflektera over kva som skjer med barnet, men også forstå våre eigne kjensler. Me treng ikkje vera eksemplariske foreldre, alle gjer feil innimellom. Men auka kunnskap gjer kvardagen lettare å handtera, seier Eva.

Mykje latter

– Dette kurset er for alle, ein treng ikkje ha noko problem i familielivet eller i foreldrerolla, forsikrar Linda Saghaug.

Siv Karin forklarar korleis ein kan melda seg på kurset:

– Du må gå inn på «familiestøtte» på Kvinnherad kommune sine nettsider, der står det meir om kven du kontaktar. Me startar med nye kurs på Hatlestrand og i Rosendal no til hausten. I vår var det venteliste her på Husnes, så me prøver med nye kurs her til vinteren.

Eva avsluttar med å rosa kurshaldarane:

– Dei gjorde alt veldig forståeleg og interessant. Det var rom for å diskutera, men ein kunne også berre vera stille og høyra på, om ein ville det. Det vert mykje latter og moro når foreldre utvekslar erfaringar. Eg vil eigentleg ta dette kurset ein gong til!

Stensletten lyser opp:

– Ja, men det er foreldre som har kome tilbake fleire gonger, så det er heilt lov!