Ros til sendinga frå valvaka: – Det var rett og slett førebiletleg
Generalsekretæren i Landslaget for lokalaviser Tomas Bruvik kjem med store ord etter livesendinga til Grenda frå Rådhuset måndag kveld.
Generalsekretæren meiner at måndagens valdag på mange måtar er sjølve nasjonaldagen for lokaldemokratiet, og skryt av Grenda si dekking av kvelden.
– Det var kjempebra, eg følgde med heile kvelden på sendinga. Det var rett og slett førebiletleg, skryt Bruvik.
Annonse
– Eg tykkjer det er viktig og flott at de satsar så stort. Dette er folk interesserte i, dei vil vita korleis det går, kven som vinn eller tapar og kven som skal styra kommunen vår. Det er jo krevjande for ei lita avis å gjera det så stort, men dess kjekkare er det når ein då prioriterer så sterkt og sender ut alle. Det håpar eg tala syner også, seier Bruvik.
Gode tal
Generalsekretæren, som også er tidlegare redaktør i både Grenda og Kvinnheringen, var heller ikkje åleine om å sitja og sjå på sendinga. Tala syner at valsendinga så langt har 3138 avspelingar, noko noverande redaktør og programvert Håvard Sætrevik er svært nøgd med.
– Me såg undervegs at det var gode sjåartal heile vegen, og det er me sjølvsagt veldig glade for. Me har alle mann i sving for å koma i mål med dette, og då er det kjekt at sjåarane opplever det som ei sending det er verdt å sjå på, seier Sætrevik.
Annonse
– Dette er ein av dei viktigaste sakene for oss som lokalavis å dekkja. Ved å laga ei slik sending så kjem me tett på veldig mange politikarar undervegs i det som er ein svært spanande kveld for dei. Det er ein god måte for oss å vidareformidla den spenninga som ligg i tala etter kvart som dei kjem, og me føler at dette er eit nyttig format for oss, fortset han.
I fylgje Bruvik var det stort engasjement blant resten av lokalavisene kringom landet også.
– Dei fleste lokalavisene har vore ute med alt dei har av folk, nokre hadde til liks med dykk også livestudio. Dei fleste ofra ganske mykje, uttalar generalsekretæren.
