Ros til naudtenestene: – Møtte ekstreme utfordringar

Lensmann Sigurd Børve orienterte kommunestyret om politiet sitt arbeid det siste året. Men det var sjølvsagt naturleg å også trekkja fram ferske hendingar som den han omtalte som «drapet på Varaldsøy» og det som kunne blitt ein storbrann i Uskedalen.

– Det har vore svært gode tilbakemeldingar til Kvinnherad brann og redning den siste veka. Det er ingen tvil om at det faglege nivået hjå brann og redning har utvikla seg mykje dei siste åra, sa Børve.

Når det gjeld hendinga på Varaldsøy, roste han måten ordførar Hans Inge Myrvold (Sp) stilte opp på. Men mest heider gjekk til det lokale brannvesenet.

– Dei møtte dei mest ekstreme utfordringar som ein kan tenkja seg for ein friviljug branntropp. All honnør til dei få brannfolka som er der borte for kva dei fekk til, sa Børve, før han kom med ei oppmoding.

– Ikkje tenk berre brann, for dei er jo også ein del av beredskapen og «first responderen» ute i bygdene. Det er noko de må ta med dykk.

Stod i stormen

Talen hans vart teken svært godt i mot av politikarane.

– Eg er veldig glad for å høyra skryten til brannvernet i Kvinnherad, sa Hege Lægreid Røssland (SF).

– Veldig ofte er det «first responderane» som er fyrst på plassen. Kjekt å høyra at ein tek godt vare på dei, følgde Are Traavik (Sp), sjølv brannmann i Ølve, opp.

Hans Inge Myrvold takka både brannfolka og lege Johanna Aggvin.

– Vi kjem ikkje utanom den lokale branntroppen. Eg vil senda ei helsing til troppen og til den lokale legen som er busett på Varaldsøy, som deltok i det som i utgangspunktet var eit livreddande oppdrag, sa han.

Kommunedirektør Ragnhild Bjerkvik utvida takkelista endå meir.

– Fyrst og fremst brannmannskap, men òg kriseteam, skule, barnehage, lege, og ikkje minst bygdefolket som stilte opp og laga kaffi og mat. Og så vil eg retta ei stor takk til ordføraren som stod i stormen og var eit samlande punkt for alle i ei så krevjande sak, fortalde ho.

Utplassering

Gunnar Våge (Sp) tok opp ei anna problemstilling i etterkant av føredraget til lensmannen.

– Det er viktig når kvardagen kjem at vi følgjer opp innbyggjarane på Varaldsøy. Ein må skapa litt tryggleik for eit lite bygdesamfunn. Men eg har forståing for at ein plasserer folk der, slik at dei kjem seg bort frå harde miljø. No har det vore plassert folk på øya i ein del år, og det har vore ein del hendingar tidlegare også, utan at det har fått så alvorlege konsekvensar. Vi må difor sjå på grunnlaget for utplassering av folk rundt omkring, slik at ein har kontroll og at bygdefolket føler seg trygge, analyserte han.

– Det Gunnar Våge seier om oppfølging, trur eg er veldig viktig, støtta Thorleif J. Hellesøy (Frp).