Ros til brannfolka og kriseteamet

Kvinnherad kommune sitt kriseteam vart kopla inn i samband med hendinga på Varaldsøy allereie i går kveld. I tillegg gjorde brannmannskapa på Varaldsøy ein stor innsats.

Ordførar Hans Inge Myrvold kunne i 08-tida fredag morgon informera om arbeidet som er gjort på Varaldsøy dei siste timane.

– Frå Kvinnherad kommune si side vart kriseteamet sett i full sving i går kveld. Min jobb gjekk ut på å syta for at både kriseteamet og brannfolk frå Husnes kom seg til Varaldsøy, mellom anna ved å organisera båtskyss, opplyser Myrvold, som sjølv var på øya i heile natt.

Han nyttar elles høvet til å takka brannmannskapa på Varaldsøy og forsterkingane som kom frå Husnes.

– Branntroppen bidrog med akuttmedisinsk hjelp og generelt beredskapsarbeid. Eg er audmjuk over innsatsen deira, og imponert over korleis dei handterte situasjonen i går, seier Hans Inge Myrvold.

Utanom brannvesenet på Varaldsøy, var det vakthavande brannsjef Thomas Hallquist frå Husnes og varabrannsjef Øyvind Ousdal frå Omvikdalen som var på øya i går.

– Vi var over i natt for å ivareta mannskapet og gje dei støtte så godt vi kunne. Dei har gjort ein fantastisk jobb, det er det ingen tvil om, seier Hallquist til Grenda.