Ros og tilskot til lokalt filmprosjekt

Formannskapet konstaterer at Merethe Offerdal Tveit er ein dyktig filmskapar, og gjev tilskot til hennar nyaste prosjekt.

Merethe Offerdal Tveit, som no er busett på Løfallstrand, skal laga ein kort dokumentar om «Gryteviks-Olino» frå Sandvik i Omvikdalen. Filmen vert éin episode i ein serie som skal publiserast på Altibox sin strøymeplattform, og som blir tilgjengeleg for dei cirka 700.000 abonnentane deira. Serien skal fortelje unike historier frå Norskekysten med «på kanten» som eit overordna tema for alle episodane.

Serien skal byrja vinteren 2022/23.

«Eg vil bruka denne mogelegheita til å fortelja ei historie frå min heimkommune, og til å fortelje om kulturarv og historie, som eg brenn veldig for å formidla meir av gjennom film», skriv Merethe Offerdal Tveit i ein søknad om pengestøtte til Kvinnherad kommune.

Fråflytta hus

Ho kjem sjølv til å vera regissør, gjera mesteparten av klippen og filma litt. Utanom dette ynskjer ho å få med seg dyktige fagfolk i alle ledd, slik at filmen kan bli av høg kvalitet, og brukast vidare i hennar portefølje og som pilot for eit større prosjekt ho held på å utvikla.

«Det skal bli ein serie om historia bak fråflytta hus rundt i landet. Tanken er å bruka denne kortfilmen frå Kvinnherad til å laga ein solid presentasjon av serieideen til NRK. Difor er det ekstra viktig at akkurat denne filmen blir imponerande og botnsolid», understrekar Tveit.

Ho søkte om 80.000 kroner i støtte frå kommunen. Saka var berre lagt fram for formannskapet som eit såkalla referert skriv, utan innstilling. Men etter forslag frå Marit Årthun (KrF) vart saka løfta opp til politisk handsaming.

– Eg tenkjer dette er noko vi kan støtta, for det er eit lokalt og spennande prosjekt, sa ho.

Skal vera stolte

Ove Lemicka (Frp) åtvara mot å «hiva oss på alle gode idear», men var likevel positivt innstilt.

– Eg tenkjer vi kan bidra, men kanskje begrensa oss, meinte han.

Varaordførar Leif Sverre Enes (H) undra om dei kunne løyva ein stad mellom 50.000 og 80.000 kroner.

– Vi skal vera stolte over å ha ein så anerkjent filmskapar i Kvinnherad, sa han.

Hege Lægreid Røssland (SF) gjekk endå lenger i rosen.

– Dette er ein fantastisk flink filmprodusent. Her vil ho fortelja om kvinnehistorie og dei som hadde vanskelege livsvilkår. Alle ære til ho for at ho tek for seg dei underkommuniserte sidene av samfunnet, analyserte Røssland.

Til slutt vart det samrøystes vedteke å løyva 55.000 kroner.