Romslege kvinnheringar
Laurdag inviterte Foreininga Romsleg alle kvinnheringar til å bli med på haldningskampanjen «Eg er romsleg». Fleire møtte opp på Husnes Storsenter for å visa si støtte til eit mangfaldig samfunn.
Publisert
Sist oppdatert
Den nyetablerte foreininga Romsleg jobbar for å fremja og feira mangfald i Kvinnherad. Laurdag inviterte dei til haldningskampanjen «Eg er romsleg». Arrangementet fann stad på Husnes Storsenter, der både små og store møtte opp til fotografering for å visa si støtte til eit mangfaldig samfunn.
– Me har hatt eit jamt besøk dei to timane me har vore på senteret, og alle som blei med såg det som viktig å støtte haldningskampanjen. Det er tydeleg at folk i Kvinnherad støttar opp under eit mangfaldig samfunn, det er fantastisk å sjå, seier dagleg leiar i Romsleg, Jorun Larsen.
Annonse
Eit mangfaldig samfunn
Dei frammøtte fekk på seg «Eg er romsleg» T-skjorte og vart fotografert. Alle portretta vil deretter bli sett saman i ein collage, produsert i stort format, og plassert på ulike stader i kommunen.
– På denne måten vil me synliggjera at innbyggjarane i kommunen vår er romslege, inkluderande og ynskjer eit mangfaldig samfunn, seier Larsen og held fram:
– Me veit det er fleire som ikkje hadde anledning å stille denne dagen, og dei skal sjølvsagt få sjansen til å bli med. Truleg blir neste fotoshoot i Rosendal, og me tar gjerne i mot invitasjonar frå bedrifter eller bygder som vil bli med på kampanjen. Då kjem me på besøk med dei fine t-skjortene våre.
Annonse
Tonje Gravdal frå Sandvoll var blant nokon av dei som vart fotografert for å visa si støtte til haldningskampanjen.
– Eg er ikkje særleg glad i å bli fotografert, men det trossa eg for ein slik kampanje. Det er eit svært viktig og flott prosjekt, som eg med store glede vil vera ein del av. Det er viktig at me vaksne går fram som eit godt eksempel for ungane våre, og ungdommar generelt. Det å visa til at alle kan vera den dei er, uavhengig av legning og etnisitet, kan bidra til eit meir mangfaldig samfunn, smiler Gravdal.
Romsleg inviterer også til ei hendig torsdag 17. mars i Kulturhuset Husnes. Då vert det foredrag med Marthe Gjerstad Hodneland og visning av kortfilmen «Hva er en kvinne?», frå 2020 laga av Marin Håskjold.
– Foredrag og kortfilm er interessant for alle som jobbar med menneske, og for alle som er menneske. Arrangementet er gratis, skriv arrangøren på Kulturhuset Husnes si nettside.
