Romankunst om stor sorg og inderleg kjærleik
Hilde Kvalvaag vitjar biblioteket med den siste romanen sin «Djuphavsslettene», førstkomande torsdag.
Publisert
«Mora hadde fire barn, no har ho tre.»
Slik startar bokomtalen av Kvalvaag sin nye roman. Med si gripande formidling og såre tematikk, har boka allereie hausta svært gode kritikkar.
Annonse
Romanen er formgjeven som ein brevsamtale mellom ei mor og den døde sonen hennar, Victor, og boka byggjer på forfattaren sine eigne røynsler. I følgje pressemeldinga frå biblioteket er Djuphavsslettene ei ufiltrert forteljing om å vere i tida og stå i sorga, og om å orientere seg fram til noko anna og nytt.
Allereie i boka «Lev vel» (2015), får vi eit møte med Victor. Denne boka har òg sjølvopplevde trekk, og Victor var stolt av å bli portrettert i romanen. Det er her vi først får høyre om vanskelege ungdomsår, der det svingar fort mellom lys og mørke. Victor tek livet sitt, berre 19 år gamal.
Frå uro til intens sorg
«Djuphavsslettene» byrjar med ei skildring av dagane til Victor i forkant av sjølvmordet. Det handlar om mora si uro og om aukande uro den dagen han ikkje kjem heim til middag. Sjølvmordet kjem som ein brottsjø, det er ein orkan som slår veggane ut av huset og forlet familien i eit inferno.
Annonse
Teksten er naken og intens. Vi møter ei mor der sorg og fortviling har teke all plass i livet: det er febrilsk røyking og valium, hektisk reising med familien, og det er leiting etter hjelp der det er von om å finne den.
«Eg skal bli sjukepleier, seier eg. Eg skal hjelpe andre. Eg skal jobbe i psykiatrien, eg vil jobbe med unge menn. Eg er som ein fuckings duracellkanin, eg høyrer det sjølv, berre dette interesser meg no. Sjukepleia, der er det frelse.»
Opp i det heile er det ein slik fin humor i romanen, den kler det tragiske, humoren er også desperat og intens, slik sorga er det.
Boka om Victor teiknar, i følgje pressemeldinga, eit vakkert portrett av eit ungt menneske som slit, men som også er glad og har mange venner og gode hendingar i livet sitt. Det handlar om å forstå kvifor Victor gjorde dette, og om skuldkjensle. Nølte han? Kva om ho hadde ringt han denne ettermiddagen?
«Djuphavsslettene» er utgjeve av Vigmostad og Bjørke, og er skriven på nynorsk.
Hilde K. Kvalvaag (f.1968) bur i Bergen. Ho debuterte med ungdomsromanen «Hjarteklapp» i 2003, og har sidan gitt ut fleire prislønte og kritikarroste bøker for ungdom og vaksne. I 2008 kom romanen «Skagerrak», som ho fekk Samlagsprisen for. Ho vart tildelt Brageprisen for beste barne- og ungdomsbok for romanen «Fengsla» i 2010.
