Risikerer å mista dagtilbodet – kommunen inviterer til møte
I kommunestyret fortalde Synnøve Solbakken (Ap) om stor skuffelse på Varaldsøy over at dagtilbodet for eldre og einslege ser ut til å forsvinna. Kommunedirektøren lovar å kalla inn til møte om saka.
Publisert
Synnøve Solbakken stilte spørsmål om dagtilbodet på Varaldsøy, som ser ut til å falla vekk i den form det er i dag. Årsaka er at personen som har hatt ansvaret for å koka og tilretteleggja no har blitt pensjonist.
– Det er mykje skuffelse kring dette, for det er det einaste samlingspunktet som er på øya for eldre og einslege. Det er fleire frivillige som hjelper til og ordnar med heimelaga middag. Brukarane betalar middagen sjølve, og er med og kokar, vaskar og ryddar. Det er sosialt, dei lagar middagen saman, og dei har ein sosial aktivitet etterpå. Når det no ser ut til å gå over på kok/kjøl, fell denne aktiviteten vekk, og brukarane føler dei mistar noko viktig, sa Solbakken.
Annonse
Éin dag i veka
Kvinnherad kommune har ikkje utgifter med denne maten, bortsett frå til to personar som har vedtak på middag.
– Spørsmålet mitt er om det framleis kan la seg gjera å leggja til rette for denne aktiviteten den eine dagen i veka det er snakk om? undra Synnøve Solbakken.
Kommunedirektør Leif Ove Mikkelsen opplyste at han har snakka med sektorleiaren om saka, og dei ynskjer å invitera frivillige til eit møte på rådhuset for å sjå kva ein kan få til i eit samspel.
Annonse
– Tusen takk for at de inviterer dei frivillige. Det trur eg det blir sett stor pris på, svarte Solbakken.
