Ripel Jensen tilbake på toppen av pallen i NM-finalen
Marius Ripel Jensen var i storslag då det var klart for finaleløp på Vålerbanen denne helga. Med det sikra han 2. plassen på samanlagtlistene denne sesongen.
Publisert
Sist oppdatert
– For ein dag. Det gjekk vår veg og vi er supernøgde, alt fungerte optimalt, skriv Marius Ripel Jensen på Facebook etter å ha køyrd fyrst over målstreken i avslutningsløpet på Vålerbanen søndag ettermiddag.
Vann etter omstart
Annonse
Men sjølv om løpet var optimalt for den fryktlause motorsyklisten frå Husnes, vart det ikkje akkurat noko plankekøyring for Marius. Det vart ein slitesiger der han kjempa om posisjonane frå start til slutt.
– Vi kom noko dårleg ut i starten og låg på ein 5. plass. Så køyrde vi oss opp på ein 3. plass før det vart raudflagg, skriv Marius.
Med raudflagg vart det også omstart, og etter det gav Ripel Jensen verkeleg gass.
– Etter omstarten kom vi ut som nummer éin, og klarte å halda den plassen heilt til mål. Det var eit spennande løp.
Annonse
Nest best i samandraget
Med siger i søndagens finaleløp og ein solid 2. plass tidlegare same dag, sikra Ripel Jensen seg nok poeng denne helga til å klatra opp på ein 2. plass i samandraget. Med det sluttar han sesongen som landets nest-beste i Superbike-klassen.
– Vi tok tilbake 2. plassen i samandraget i NM. Takk til Jan Nordhagen som har vore med oss som mekanikar gjennom helga, tusen takk til alle sponsorane våre som gjer dette mogleg, skriv Ripel Jensen.
