Riksveg 13 i Hardanger kan bli stengd på kort varsel

Statens vegvesen overvakar riksveg 13, der det gjekk skred tysdag. Dei følgjer situasjonen i fjellsida tett.

– Me har låg terskel for å stenga vegen viss vi fryktar nye skred. Det betyr at folk bør ha dette i tankane når dei planlegg reiser i helga, seier byggeleiar Rolf Anders T. Svensson i ei pressemelding frå Statens vegvesen.

Vegstenging blir tidlegast aktuelt søndag, når det er venta meir regn.

Meir stein i fjellet

Tysdag morgon gjekk eit stort steinskred mellom Tyssedal og Stana, som førte til at fleire hundre kubikk stein fall ned i vegen. Det førte til skadar på vegen og på fangnettet. Vegen vart opna same kveld, og det er no fri ferdsel på strekninga. Men det ligg framleis att fleire hundre kubikk stein nokon hundre meter opp i fjellsida.

– Det er stabilt no, men med store nedbørsmengder kan det komma eit skred. Meteorologane har varsla om auka nedbør frå sundag, og sterkare måndag. I tillegg til å følgja med vêrvarselet, etablerer me fysiske observasjons- og lyttepostar ved Stanatunnelen og Okslatunnelen for å følgja situasjonen tett, seier Rolf Anders T. Svensson.

Trafikkinformasjon

Han oppmordar folk til å følgja med på trafikkinformasjonen på 175.no. Viss vegen må stenga, vil det bli sett opp informasjonsskilt i Kinsarvik.

Statens vegvesen har tett samarbeid med Ullensvang kommune, naudetatane og transportselskap om beredskapen. Viss vegen skulle bli stengt i lengre tid, er det aktuelt å setja opp båtskyss.

Nytt fanggjerde

Skredet tysdag tok og med seg fanggjerdet som var sett opp for å sikra vegen. Statens vegvesen planlegg å setja opp eit nytt fanggjerde med større dimensjonar.

– Dette er ikkje hyllevare, så vi er avhengige av leveringstida. Men eg vonar at det kan vera på plass før seinhausten, seier Rolf Anders T. Svensson.