Revy og pølseselskap - Fleire generasjonar feira barnehagen i Åkra
20-årsjubileet til Åkra Barnehage vart feira med både god mat og flott underhaldning i den store revyen til Åkra Bygdalag.
Festen starta alt på ettermiddagen laurdag, med pølser og kakeselskap i barnehagen, med mellom 30 og 40 gjester.
– Me hadde handsopprekking på kor mange av gjestene som har gått her i denne barnehagen, og då kom me til 17 hender, fortel Gunnlaug Tjelmeland, styrar i barnehagen.
Annonse
Myldra med smårollingar
Det var i 2004 at barnehagen flytta frå skulebygget og inn i nye lokale. Her har det vore kjekt å driva barnehage, meiner Tjelmeland.
– Det var ei stund det var fullt her. No er me ein gjeng på fire ungar, og så startar det ein ny i mars. Her ventar det alltid ein klem, og ungane leikar så fint her, seier ho.
Fleire av dei som gjekk i barnehagen dei første åra, har no begynt å produsere ein ny generasjon med barnehageungar til Åkra. Tjelmeland sette pris på å samla unge og gamle til selskap.
Annonse
– Det var fleire av dei som har gått her før som kom med sine små. Her myldra det med smårollingar, og det likar me jo, ler ho.
Gode på mobilisering
Men det var ikkje nok med pølsefest. I Åkra mobiliserte dei heile bygda, og laga revy. Det var barnehage- og skuleungar som starta showet, med ein stemningsfull dans til «Dovregubbens Hall» av Edvard Grieg.
– Det var visuelt veldig flott. Etter kvart som musikken vart villare, så tok dansen heilt av, fortel Gunnlaug Tjelmeland.
Etter opningsnummeret følgde fleire underhaldande revynummer. Tjelmeland trekkjer mellom anna fram ein engasjerande sketsj til «Badebussen», der nokon av karane i bygda verkeleg baud på seg sjølve.
– Det vart servert snittar, og vaksenrevyen var ikkje ferdig før i halv ti tida på kvelden, fortel Tjelmeland.
Annonse
Det er tydeleg at Åkra er gode på å mobilisera og samla seg for kjekke aktivitetar i bygda.
