Rett kalla prest
Sundag var det duka for historisk gudsteneste i Husnes kyrkje. Åse Selsvold vart vigsla til prest framføre ei fullsett kyrkje.
Publisert
Åse har jobba som prestevikar i Husnes og Holmedal sokn i 2 ½ år, og no har ho blitt tilsett som sokneprest i dette soknet av Bjørgvin bispedømeråd.
– Eg har jo hatt nokre år å bli kjend med jobben og med nokre av folka her, men no kjenner eg ganske tydeleg at det er på «ekta», fortel Åse.
Annonse
Åse, som er ifrå Bømlo, starta på grunnfaget i teologi i 1995, før ho hadde nokre år ilag med familie og anna jobb. For om lag 10 år sida tok ho opp igjen studiet, samstundes som ho hadde full jobb og familie å ta seg av.
– Eg har gjort meg ferdig med studiet litt etter litt. Eg tok semester for semester og fag for fag. Eg har hatt noko hengande over meg så lenge no, med studie og eksamenar, men no blir det berre jobb og fritid, og det kjennest veldig godt å endeleg koma i mål, seier ho.
Historisk gudsteneste
Husnes og Holmedal sokn har aldri tidlegare hatt ei kvinneleg sokneprest, og det er heller ingen kvinner som er vorte vigsla til prest i Kvinnherad.
Annonse
– Det er ikkje så ofte vi har kvinner som blir ordinert, det er stas at Åse har valt å kvalifisera seg som prest. Det er som kjend mangel på prestar i Noreg, og no har vi fira dugande prestar i Kvinnherad, så vi er veldig glade for å ha dekka oppom behovet, fortel Prost i Sunnhordland, Svein Arne Theodorsen, og legg til;
– For oss var det ei veldig spesiell høgtidsstund. Det var kjekt å sjå at det kom så mange, både frå andre sokn og tilreisande ifrå Bømlo.
Den nyleg pensjonerte biskopen i Bjørgvin Halvor Nordhaug var den som vigsla Selsvold. Han gav uttrykk for at det var ei stor glede å få ta del i gudstenesta.
– Kjære kyrkjelyd, og kjære Åse; gratulera med dagen. Det er ein stor dag for deg og det er ein stor dag for bispedømmet og for folket her på staden å få ein vigsla prest. Dei kjenner deg jo godt allereie, men no skal det bli orden på tinga. Det er også ein stor dag for meg, veldig hyggeleg at gamlebiskopen vert innkalla som reserve i det vetle vindauget vi har mellom ein avtroppande og ein påtroppande biskop. Veldig kjekt å få koma til vakre Sunnhordland og til Husnes, der sola som kjent alltid skin, iallfall i dag, sa han i vigslingstala si.
Vidare fortalde han kor imponert han er over Åse si målbevisste og mangeårige innsats med prestestudiet i tillegg til full jobb og ansvar for barn.
– Du har fullført eit langt og krevjande studium. Det vitnar om ei sterk vilje og om eit kall som eg veit du har kjent på lenge før du byrja på teologistudiet. Og det kallet du har kjent på, det får du i dag ei stadfesting på ifrå kyrkja. Ditt kall møter kyrkjas kall.
Annonse
Rett kalla prest
Åse vart så rett kalla prest, og haldt si fyrste preike som vigsla prest. Etter nattverd og velsigning samla kyrkjelyden seg til kyrkjekaffi der dei fekk servert nydeleg marsipankaka og Åse fekk servert flotte helsingar.
– Det var ein stor dag. Eg vart litt overvelda over alle dei fine helsingane ved kyrkjekaffien, lurte eit augneblikk på om det var meg dei snakka om. Det tok meg lang tid å landa i går kveld, fortel ei oppglødd og litt rørt Åse Selsvold.
Mange gjorde teneste i gudstenesta, mellom anna prost i Sunnhordland Svein Arne Theodorsen, dei tre andre sokneprestane i Kvinnherad; Kjersti Brakestad Boge, Carsten Mrusek og Kjetil Kringlebotten, klokkar og soknerådsleiar Liv Slettemark og kyrkjeverje Torstein Aarthun.
Kantor var Eva Megyesi, som saman med Aslaug Hellesøy, Kristian Bringedal og Svein Rimestad song som kvartetten «Ære».
