Rekordutbetaling – 73 foreiningar i Kvinnherad får momskompensasjon
Lotteri- og stiftelsestilsynet betalar ut 2,7 milliardar i momskompensasjon til frivillige organisasjonar. 73 av dei er heimehøyrande i Kvinnherad.
Publisert
Sist oppdatert
Lotteri- og stiftelsestilsynet skal utbetala momskompensasjon til 24.343 organisasjonar i Norge. Totalbeløpet er på 2,7 milliardar kroner.
– Aldri før har så mange søkt momskompensasjon på varer og tenester. Det viser at det er høg aktivitet i dei frivillige organisasjonane, og at vi lukkast med å gjera ordninga kjent, seier avdelingsdirektør Marianne Skjeldestad Hove i Lotteri- og stiftelsestilsynet i ei pressemelding.
Annonse
I alt var det 2720 ulike søkjarar. Fleire av søkjarane er sentralledd som søkte på vegner av sine organisasjonar. Dei vil fordela beløpa vidare til sine underledd. Største sentralleddet er Norges idrettsforbund, som i alt får 967 millionar kroner. Deretter kjem Norges Røde kors med 108 millionar og Norges Musikkorps Forbund med 70 mill.
Den største kategorien er idrett. Til slike føremål vert det i alt utbetalt 994 millionar kroner. Nummer to er tru- og livssynsorganisasjonar som sikra seg 327 mill.
Kvinnherad
I Kvinnherad er det 73 lag og organisasjonar som i alt får utbetalt vel 3,6 millionar kroner.
Annonse
Den klart største summen går til Stiftinga Halsnøy historiske senter. Den sikra seg heile 746.750 kroner. Festidalen i Uskedalen kan på si side gle seg over 416.376 kroner. På dei neste plassane kjem tre idrettslag; Trio, Rosendal turnlag og Uskedal idrettslag. I alt er det ni organisasjonar i Kvinnherad så får eit sekssifra beløp inn på konto.
