Rekordtidleg slått

Rosendalsbonden Lars Johan Næs kan ikkje alle fall ikkje minnast tidlegare slått.

– Eg hugsar å ha slege 27. mai for om lag ti år sidan, men dette er ei veke tidlegare igjen. Det er jo eigentleg gode greier, sjølv om pessimistane seier at me vil få det igjen seinare. Men me får sjå, ved eit normal år så har me to gode slåttar til, seier Næs.

– Er du redd for at dette kan bli eit nytt 2018 då det var så tørt?

– Ja, det er klart, og det er jo ting som kan tyde på det. No tek me i alle fall fyrste slåtten og er nøgde med det. Me er jo ikkje akkurat dei mest tørkekutsette her, sjølv om me sjølvsagt kan få problem med det likevel, konkluderer han.

I fylgje Næs var det nabobonden Mari Mehl som var fyrstemann ut med slåttemaskinane i Rosendalsområda i år.

– Ho byrja her ein dagen, men dei fleste her inne har byrja å slå no. Det er viktig å få det inn, spesielt i varmen då utviklinga går så snart. Næringsverdien tapar seg dersom graset får stå for lenge, forklarer Næs før han høfleg takkar for praten og på ny hiv seg i traktoren. Det er trass alt mykje å gjera før regnet kjem.