Rekorddeltaking under elghundutstillinga på Seim

– Det er 78 hundar som deltek totalt, ni grå, fem kvalpar og 69 svarte, smilte Anita Lie, medan dei svarte vaksne hannhundane i tur og orden vart leia rundt i manesjen på den gamle skuleplassen utanføre skyttarhuset på Seim.

Utstillinga er eit fesjå kor dei firbeinte blir vurdert og premiert etter fleire kriterium, som til dømes beinstilling, høgd, halesnurr og gemytt. For dei som driv med avl er dette ein stad der dei kan planleggja framtidige partnarar for hundane sine.

Stadig meir populær jakthund

Svart elghund har eksistert som eigen rase frå midten av 1800-talet. Den er den minste av elghundane, og er godt eigna som bandhund. Til trass for at rasen var nær utryddingstruga på 1950-talet, er den i dag ein stadig meir populær jakthund, mellom anna grunna systematisk avl. Det årlege registreringstalet av kvalpar ligg no mellom 180-220, noko fleire svart elghund-entusiastar i Kvinnherad bidreg til.

Det lokale engasjementet for rasen viser att i styret til Hordaland Elghundklubb, kor Vidar Hellås er leiar og Anita Lie er nestleiar. Dette er også ein av grunnane til at dei årlege elghund-utstillingane dei siste åra har blitt halde i Kvinnherad.

Og etter lydnivået å døma var stamtavlene på elghundane som var kome frå heile Vestlandet jamt over god, då både kvalpar og vaksne hundar såg ut til å ha latt helgefreden senka seg.

– Til å vera rundt 80 hundar her er det ganske lite bråk, ein skulle ikkje tru det var hundeutstilling her, kommenterte Atle Helland, før han la til at det uansett var stor velvilje frå naboane til at klubben kunne gjennomføra utstillingane sine der, år etter år.

Ein får det ikkje betre, meinte han.

– Her har me alt me treng lett tilgjengeleg, det er gode moglegheiter for parkering, og så har me jo butikken like ved, la Lie til.

Viktig for dokumentasjon og framtidig avl

Hordaland Elghundklubb har eit svært aktivt miljø i Kvinnherad, kor fleire driv med avl av rasen. Desse årlege utstillingane bidreg til at dei som avlar kan dokumentere hundane deira sine eigenskapar til nye kundar.

Difor var dei svært nøgde med dommaren til årets utstilling.

– Det er Bjørge Christiansen frå Trondheim som er dommar. Det er ikkje så mange som er flinke til å dømma hundane på eksteriør, kanskje berre ein handfull i landet, og han er ein av desse. Mellom anna er han god på å grunngje vurderingane sine, noko som gjer at hundeeigarane forstår og aksepterer dei, forklarte Helland.

Observasjonar som «litt sirkushest-aktig», «trong bak» og «spiss i snuten» var blant dei Christiansen formidla då Grenda var innom utstillinga. For ordens skuld: Elghund er ein typisk spisshund.

Anita Lie er blant dei som avlar rasen, og ho hadde akkurat levert frå seg ti kvalpar. Difor var ikkje tispa hennar med i konkurransen, sidan tidlegare matstasjonar for svoltne små – no hengepupper – visstnok ikkje scorar høgt på eit slikt fesjå.

Premiering

Tore Furdal er blant dei andre kvinnheringane som avlar på svart elghund. Han figurerte i manesjen, men ikkje med eigen hund. Med seg i band hadde han Ull, hannhunden til Christina Mehl frå Rosendal. Både den to- og firbeinte klarte seg godt i ringen, men berre Ull gjekk lukkeleg heim med fleire heiders-rosettar i bagasjen.

Utstillinga, som fokuserer på eksteriør og rørsle, resulterte i premieutdeling, kor beste hann og ho vart kåra i kvar klasse (BIR og BIM), før den gjævaste heideren «best in show» (BIS) vart delt ut.

Ingaleden’s Bm Garm, som stilte i championklassa for dei svarte elghundane, gjekk til topps, og kunne smykke seg med heidersmerket BIS. BIS 2 gjekk til GÅ Kaisa, som stilte i juniorklassa for grå elghund-tisper. GÅ Kaisa sin stolte eigar var Tor Fjellheim.

I tillegg til eksteriør-utstillingane blir det også halde eigne jaktprøvar for norsk elghund. Også desse prøvane bidreg til å dokumentere hundane sine eigenskapar, både som brukshundar og i samband med avl.