Rekord for Alsaker-konsernet

Alsaker Fjordbruk omsette for småfine 1,76 milliardar kroner i fjor. Resultatet før skatt enda på 710 millionar.

Det solide overskot gav Alsaker-konsernet, som er konsernselskapet til Alsaker Fjordbruk, ein resultatmargin på 40,4%. Eigenkapitalen er på 1.031 millionar kroner, noko som gir ein EK-andel på 52%.

Alsaker er eit oppdrettskonsern som syslar med produksjon av laks. Konsernet dreiv i 2016 fem smoltanlegg, 22 matfiskkonsesjonar og eitt slakteri. Produksjonen skjer i 13 kommunar: Bømlo, Etne, Fusa, Kvam, Kvinnherad, Meland, Sveio og Tysnes i Hordaland, samt Haugesund (Røvær), Rennesøy, Suldal, Tysvær og Vindafjord i Rogaland.

I 2016 produserte konsernet 32.500 tonn laks, mot 31.500 tonn året før.

– Produksjonsmessigt har 2016 vore eit heller svakt år for konsernet. Produksjonsvolumet gjekk likevel litt opp samanlikna med 2015, medan slaktevolumet var stabilt. Det er framleis mykje tilveksttap i samband med avlusing av laks, skriv konsernet i ei pressemelding.

 

Kraftig prisvekst

Alsaker opplyser at den internasjonale marknaden for laks har vore prega av ein sterk etterspurnad også i 2016.

– Dette, kombinert med at det globale tilbodet av atlantisk laks vart redusert med 4%, resulterte i at gjennomsnittleg pris på laks eksportert frå Norge auka med 36% samanlikna med året før, står det i meldinga.

Konsernet brukte over 125 millionar kroner på utviklings- og innovasjonsprosjekt i 2016. Ved utgangen av året hadde dei 232 fast tilsette.