«Reiseklar» for dei reiseklare

Appen har fått namnet «Reiseklar», og dette er det truleg mange som kan kjenne seg att i. Sidan mars 2020 har UD rådd frå alle unødige reiser utanlands, og dei globale reiseråda har løyst gradvis opp sidan juni i år.

Utenriksminister Ine Eriksen Søreide informerer i ei pressemelding at appen også skal gjere det mogleg å registrere utanlandsreiser, slik at ein lettare kan få hjelp dersom lokale krisesituasjonar oppstår medan ein er på reise. Ho understrekar at me ikkje er i ein normalsituasjon enno, men at me er på veg dit.

Fleire reiser

– Fleire har byrja å reise meir. I ein del land vil det framleis vera vanskeleg å vera på reise og reglar og restriksjonar kan endre seg raskt. Det er mange detaljar og mykje informasjon for reisande å setje seg inn i, og vårt mål er at norske borgarar på reise skal kunne ta så opplyste val om eigen tryggleik som mogleg, seier ho.

UD har i løpet av dei siste to åra sett kor avgjerande det har vore at norske borgarar har registrert reisene sine, slik at dei det gjeld lettare kan få informasjon frå norske myndigheiter i ein krisesituasjon.

«Reiseklar»-appen skal difor mellom anna bidra til enkel registrering av eigne reiser. I tillegg tilbyr appen også oppdatert reiseinformasjon for nær 200 land, reiseråd frå UD, samstundes som ein kan få varslingar frå landet ein oppheld seg i. Appen inneheld også anna nyttig informasjon:

– Informasjon som er nyttig å vite når du er på reise, til dømes kva du må gjere dersom du mister passet eller har behov for rettleiing eller hjelp, skriv Utenriksdepartementet i pressemeldinga.

I følgje UD er det teke omsyn til personvernet i utforminga av appen, og personvernerklæringa kan lesast her.

I følgje tala frå Google og Apple, som har om lag eitt døgn forseinking, er det så langt registrert 37 000 nedlastingar frå App Store, og rundt 15 000 fra Google Play.