Reingjer kjølesystem og gir det ti nye leveår

Ute i oktoberregnet står Øyvind Seglem om høgtrykkspyler eit kjøleanlegg frå ein båt som ligg i dokk i Ulsteinvik. Tid er pengar, og slik er det også for reiarlag som har båtane sine liggjande uverksame.

Difor jobbar Seglem bokstavleg tala på høgtrykk, saman med kollegaane Sverre Vik, Thomas Aleksandersen og Sindre Tyssedal Leivestad for å få kjøleelementa klare igjen.

Verda rundt

Kvartetten jobbar i Nordic Green Product, og held til i eine hallen til Hellesøy Verft på Løfallstrand. Det Sotra-baserte firmaet har laga seg ein operativ avdeling i Kvinnherad, styrt av operativ leiar Atle Falk, som også er ein av fire medeigarar i selskapet.

– Me har den opersjonelle avdelinga vår her i Kvinnherad, og dekker Vestlandet herifrå, seier Falk til Grenda.

Men dei breier seg vidare ut enn det. Selskapet har tre lager i spreidd utover vestkysten i Afrika, både i Ekvatorial-Guinea, Elfenbeinskysten og Namibia, samt i Dubai og Singapore. Nyleg etablerte dei avdeling i Aberdeen.

– Karane her reiser ut til desse stadane og gjer denne typen arbeid ute ved verfta der.

Skipsbransjen dokkar der dei har aktivitet, og då må me vera til der dei verfta er. 80 prosent av vår aktivitet er utanfor Kvinnherad, påpeikar Falk.

– Me prøver å samla vestlandsaktiviteten her på Løfallstrand. Internasjonalt reiser me ut med to til fire tilsette, og tar servicen på staden. Det er unge, flinke og sjølvstendige karar som gjer jobben, gjerne med bistand frå det lokale verftet, rosar Falk.

Recoating

Jobben som Seglem, Vik, Aleksandersen og Leivestad gjer byr op reingjering av kjølesystem utandørs, med kjemisk bad og høgtrykkspyling, før blir dei sendt til Årsnes for sandblåsing og så ny, dekkande maling av kjølesystema. Malinga er spesialdesigna for å hindra korrosjon. Recoating er faguttrykket Falk bruker.

Det som er på Løfallstrand no, er heile kjølesystemet til ein båt som ligg i dokk i Ulsteinvik. 16 kjøleelement, også kalla bokskjølarar, er henta ut av skipet, lasta på trailer og køyrt til Løfallstrand for å bli som nye.

– Me reingjer elementa, og tar komplett service på dei. Når dei kjem tilbake, så har dei ti års lenger levetid. Ein båt med dårleg kjølesystem om bord, bruker meir drivstoff, og det er både dårleg for økonomien og dårleg for miljøet, forklarer Falk.

– Me brukte 11 dagar på dette då eg starta. No er me nede i seks, seier Sverre Vik, som har fire år og 1000 bokskjølarar bak seg for NGP.

Regelverk

Det som var tre tilsette i 2021, er 16 no. Fire av dei er frå Kvinnherad. Det er det andre beinet NGP står på, er oppgradering av skumanlegg på ferjer. Alle ferjer er pålagt å ha eit overrislingsanlegg, om dei skal kunna frakta tankbilar og liknande.

Innan 2027 må dei byta om til fluorfritt brannskum. For å kunna gjera det, må det det gamle skummet ut av overrislingsanlegget på ein miljømessig og forskriftsmessig måte.

– Me har funne ein metode for til å spyla ut og reingjera eksisterande skumanlegg på ferjer som følgjer desse krava, slik at dei kan gå over til eit brannskum som er i tråd med regelverket frå 2027, forklarer Falk, som fortel at NGP skal ta heile flåten til Torghatten og å spyla ut alle rislesystema deira.

– Det er ein del ferjer i landet, konkluderer Falk, og trur det blir nok å gjera på i den nisjen også framover.