– Reiarlaga skal levera på inngåtte avtalar
Fylkespolitikarane er tydelege på at endra praksis hjå Sjøfartsdirektoratet kring kviletidsreglane ikkje skal gå ut over beredskap og rutetilbod.
Publisert
Sist oppdatert
Den 6. mars drøfta fylkesutvalet konsekvensane av Sjøfartsdirektoratet sin endra praksis knytt til regelverket om kviletid. Ifølgje Vestland fylkeskommune si heimeside var det stort engasjement i saka og mange som tok ordet.
– Fylkeskommunen har inngåtte avtalar med operatørane som skal sikre at ferjene skal gå til oppsette tider. Når det no ikkje skjer, skal dette ikkje gå ut over dei reisande, seier fylkesordførar Jon Askeland til fylket si nettside.
Annonse
Det blir opplyst at Sjøfartsdirektoratet sidan 2023 har stramma inn på dispensasjonspraksisen frå reglane om kviletid for tilsette på ferjene. Endra skiftordningar har gjeve store utfordringar for drifta på mange samband i fylket, også i Kvinnherad, med kansellerte avgangar på kort varsel.
Tek sjansen
Fylkesordførar Jon Askeland var tydeleg på at slik det er no kan ikkje dei reisande ha det.
– Reiarlaga skal levera på inngåtte avtalar. Fylkeskommunen har i sine avtalar klare krav om at ferjene skal gå. Strengare dispensasjonspraksis har vore kjend for reiarlaga, og vi forventar at ferjeoperatørane dimensjonerer ut frå desse krava når dei leverer tilbod til oss, og ikkje tek sjansen på dispensasjonar slik praksis gjerne har vore. Det same gjeld om arbeidstidsavtalar er endra, sa han.
Annonse
Fylkesutvalet vedtok samrøystes følgjande:
«Fylkesutvalet understrekar at rutetilbodet skal vera i samsvar med inngåtte avtalar. Eventuelle endringar i rutetilbodet må konsekvensutgreiast. Det skal vera dialog med relevante kommunar og brukargrupper. Før eventuelle endringar vert sett i verk skal dette handsamast politisk.
Fylkesutvalet ser ikkje at ein kan terminera ordninga med beredskapssamband, før det er avklart frå Samferdselsdepartementet kven som har ansvaret for å dekka meirkostnadane med dette».
Utkvilte
Fylket skriv vidare at det tidlegare har vore vanleg at ferjeoperatørane har fått dispensasjon frå kviletidsreglane for å få til attraktive skiftordningar, slik at det rutetilbodet som Skyss har bestilt kan gjennomførast. Når Sjøfartsdirektoratet no har stramma inn er det grunngjeve med at dei tilsette skal vera utkvilte av tryggleiksmessige årsaker.
–Vi har sjølvsagd full forståing for dette kravet frå Sjøfartsdirektoratet. Vi skal ha eit velorganisert arbeidsliv til sjøs, men riktig dimensjonering av tilsette knytt til turnus og reglar sett av Sjøfartsdirektoratet ligg til reiarlaga og skal ikkje gå ut over våre reisande, seier fylkesordførar Jon Askeland.
