Regjeringa vidarefører alle tiltak

Under ein pressekonferanse tysdag vart det klart at korona-tiltaka held fram til over påske.

Det er no nesten to veker sidan regjeringa kom med dei mest inngripande tiltaka Norge har hatt i fredstid. 12. mars iverksette nemleg regjeringa ei rekkje tiltak for å slå ned på spreiinga av koronaviruset.

Tysdag ettermiddag kunne statsminister Erna Solberg fortelja at dei strenge tiltaka blir vidareført til over påske, til og med 13. april.

- Dessverre betyr det nye veker med sterke avgrensingar på liva våre. Men vi gjer det for alle vi er glade i og for at dei skal behalda liva sine, sa Solberg på tysdagens pressekonferanse.

Det betyr at skular og barnehagar vil halda stengt fram til og med 13. april.

- Det er ikkje mogleg å seia i dag kor raskt smitten spreiar seg. Det vil ta nokon dagar før vi ser resultatet frå tiltaka vi sette i verk 12. mars. Først når vi ser resultata av dei har vi eit grunnlag for å seia om vi kan mjuka opp eller skjerpa tiltaka, sa Solberg.

 

Maks fem personar i ei folkemengd

Helse- og omsorgsminister Bent Høie gjekk så gjennom tiltaka.

- Talet nysmitta i Norge ser ut til å vera stabil, det kan vera eit teikn på at tiltaka fungerer, men det er for tidleg å seia sikkert. Difor held vi fast på tiltaka våre. Både dei enkle og viktig, som å vaska hendene sine, hosta i olbogen og halda avstand. Men òg dei tøffe tiltaka som stenging av skule og barnehage, sa Høie.

I tillegg la han vekt på at ein utandørs skal halda ein meters avstand til kvarandre, og at ein ikkje bør vera meir enn fem personar samla i ei gruppe utandørs.

Regjeringa vil i løpet av påskeveka ta nye vurderingar og sjå om tiltaka kan mjukast opp eller om dei må skjerpast inn.