Regjeringa føreslår endringar i støtteordningane

Regjeringa vidarefører kompensasjonsordninga for næringslivet ut februar og innfører reglar om tilbakebetaling av tilskot.

– Eg har hatt tett kontakt med partane i arbeidslivet, og har besøkt råka bedrifter rundt om i landets byar. Dei har gitt oss innspel til korleis dei økonomiske ordningane treff og kan betrast. Desse tek vi med oss, og difor gjer vi nokon endringar i ordningane, seier næringsminister Jan Christian Vestre.

Den generelle kompensasjonsordninga for næringslivet vert forlenga ut februar.

– Vi forlenger ordninga fordi vi ynskjer mest mogleg forutsigbarheit for bedriftene. I tillegg har vi varsla at kompensasjonsordninga opnar i slutten av januar. Eg vil oppmoda alle som vil søka om å førebu sine søknadar og senda dei inn med ein gong det opnar. Bedrifter som har papira i orden, vil kunna få pengar på konto innan eit par dagar, seier Vestre.

Bedrifter som ikkje i tilstrekkeleg grad fell inn under kompensasjonsordninga, kan søka midlar gjennom den kommunale kompensasjonsordninga. Regjeringa føreslår å styrka denne med ytterlegare 500 millionar kroner.

Dei føreslår også at tilskot frå den generelle kompensasjonsordninga i visse tilfelle skal tilbakebetalast. Dette skal berre gjelda tilskot frå og med november 2021.

– Dette er fellesskapet sine midlar. Difor vil vi stilla krav til bedrifter om å betala tilbake tilskot dersom dei går i overskot. Dette har vi fått fleire tilbakemeldingar på, og vi vil sjå på nokon tilpassingar av regelverket, seier næringsministeren.

Basert på innspel under høyringa og frå møter med næringslivet, ser regjeringa på tilpassingar av overskotsregelen. For eksempel skal det vurderast om bedrifter kan trekka frå underskot dei hadde i 2020, og om minstebeløpet for overskot skal hevast frå forslaget på 5000 kroner, står det å lesa i pressemeldinga.

Regjeringa føreslår også å gjeninnføra støtteordninga for store publikumsopne arrangement frå og med desember 2021. Ei ordning som vil gjelda til og med juni 2022.

Dette er ordningane:

Kompensasjonsordninga for næringslivet:

Ordninga som dekker faste, uunngåelege kostnadar vert vidareført for november 2021 og fram til og med februar 2022.

* Tilskot vert gjeven til føretak som har hatt stort omsetnadsfall, og skal bidra til å dekka faste, uunngåelege kostnadar.

* For tilskotsperiode november og desember 2021, vil det vera mogleg å søka støtte i januar, med forbehald om tilslutnad frå Stortinget.

* Det er dette tilskotet som er omfatta av tilbakebetalingskrava.

Kompensasjon for tapt varelager:

Regjeringa gjeninnfører ordninga med kompensasjon for tapt varelager for desember 2021 og januar 2022.

* Tapt varelager kan kompenserast sjølv om det har vore donert til velgjerande formål. Bedrifter må hugsa dokumentasjon, og vera klar over skatte- og avgiftsmessige konsekvensar.

* Bedriftene som fell inn under dette, kan få kompensert opptil 100 prosent av anskaffingskostnadane til varelageret.

Støtteordninga for store publikumsopne arrangement:

Støtteordninga for store publikumsopne arrangement er føreslått gjeninnført for perioden desember 2021 til juni 2022.

* Tilskot vert gjeven til store publikumsopne arrangement av nasjonal/regional verdi som er avlyst eller nedjustert som følgje av råd og pålegg frå myndigheitene på grunn av pandemien.

* Målgruppa for ordninga vil vera arrangør eller medarrangør av slike arrangement som i tidlegare periodar.

* Maksimalt tilskotssum vert føreslått å bli på maksimalt 60 prosent av faktisk underskot som følgje av avlysing.

* Regjeringa føreslår justeringar i inngangskriteriet i ordninga, her meint at kravet om forventa tal besøkjande på minst 200 personar på arrangementet vert sett ned til 100 personar.