Redusert symjeopplæring frå hausten av
I fjor haust vedtok kommunestyret å gjera ei innsparing i drifta av basseng og symjeopplæring i skulane i Kvinnherad. Innsparinga medfører at det vert endringar i symjetilbodet i Kvinnheradskulen frå hausten av.
Publisert
Sist oppdatert
I eit informasjonsskriv til føresette påpeikar Anne Sofie Kjeka, sektorleiar for oppvekst, at elevane i Kvinnherad framleis skal verta symjedyktige, sjølv om det blir redusert tilbod i symjeopplæringa. Drifta av basseng og symjeopplæring skal reduserast med totalt 2.029.500 kroner, fordelt på Sektor oppvekst og Sektor teknikk og miljø.
«Skulen er pliktig til å gjera eleven symjedyktig og at kompetansemåla for symjing, sjølvberging og livredning blir nådd, men opplæringa bør skje i samspel mellom skulen og foreldre/føresette si oppfølging av barn.» skriv Kjeka i informasjonsbrevet.
Annonse
Gruppa som har arbeidd med å etablera ei best mogleg løysing etter innsparingane, har lagt til grunn prinsipp om at alle elevar skal ha eit likeverdig tilbod, med minimum 50 timar i bassenget. Slik planen no er lagt opp vil tilbodet vera likeverdig, og alle elevar vil oppnå målet med minimum 50 timar som ein total i den tiårige grunnskulen. For 2.trinn er det lagt opp til minimum 14 timar, 4.trinn får minimum 44 timar, 5.trinn minimum 14 timar og 8. (-10.) trinn får etter planen minimum 18 timar. Timetalet er fordelt på innandørs og utandørs symjetrening.
Kompetansemål
For å oppnå best mogleg opplæring er det, i følgje skrivet til Kjeka, tatt utgangspunkt i kompetansemåla i Læreplan for kroppsøving. Læreplanen seier mellom anna fram at ein på 4.trinn skal «vere symjedyktig ved å falle uti på djupt vatn, symje 100 meter på magen, og undervegs dykke ned og hente ein gjenstand med hendene, stoppe og kvile i 3 minutt (imens flyte på magen, orientere seg, rulle over, flyte på rygg), så symje 100 meter på rygg og ta seg opp på land.»
Bassenga i dei ulike bygdene skal, etter den planlagde reduksjonen, ikkje ha opningstider som føl skuleruta, og moglegheita til å gå i bassenget på fritida vert såleis også redusert. Undarheim skal etter planen ha drift i ni månadar, Øyatun og Rosendal skal ha drift i 6,5 månadar, og det er planlagt for fem månadar drift ved bassenget på Hatlestrand.
Annonse
Noregs svømmeforbund og Svømmedyktig.no har bidrege til å kvalitetssikre organiseringa av det nye og reduserte tilbodet.
