Reddar Fjelbergsambandet frå likviditetskrise

Fjelbergsambandet AS har ikkje nok midlar til å betala lønn og rekningar. Eit samla kommunestyre gjekk difor inn for løyva eit større tilskot.

Tidleg i sommar vart det halde møte mellom Fjelbergsambandet AS og kommunedirektøren. Der kom det fram at selskapet det siste året har brukt mykje ressursar på utarbeiding av naudsynt dokumentasjon, mellom anna var det leigd inn konsulent for å laga kostnadsoverslag, forprosjekt flytebru, belastnings- og risikovurdering. Ein er no i gang med straummålingar i Sydnessundet, men dette vert betalt av Kvinnherad kommune.

«Kvinnherad kommune har òg gjennom Norconsult fått avklart vegtrasé som ser ut til å verte godkjent av alle offentlege instansar», skreiv styreleiar Ove Lemicka og dagleg leiar Odd Ivar Øvregård i ei oppsummering etter møtet.

Bølger og dønningar

Dei fortel vidare at det framleis er store oppgåver som skal løysast.

«Her kan nemnast gjennomføring av grunnboring i områda for feste av bru. Radarmåling av reelle bølger og dønningar i Sydnessundet. Kostnadsanalyse av veg og bru mellom øyane. Gjennomføring av prosess med Kystverket i høve seglingshøgde med meir. I tillegg ferdiggjering av reguleringsplanen», står det. Duoen estimerer eit samla pengebehov på 3 til 5 millionar kroner.

I eit nytt skriv den 16. august opplyser dei at Fjelbergsambandet AS har om lag 100.000 kroner på konto. Men dei har ubetalte fakturaer på 30.000, ubetalt løn og honorar for april til juni på 80.000, og heller ikkje betalt styrehonorar for 2022 på 50.000. Arbeid som hastar no inkluderer den ovannemnde grunnboringa, noko som fort kostar 450.000 kroner pluss moms. Bølgemålinga reknar ein med vil krevja 400.000.

Fjelbergsambandet AS bad difor kommunen om minst 1 million i snarleg likviditetsstilskot. Til kommunestyret på torsdag la kommunedirektøren fram ei innstilling om å løyva akkurat denne summen no, og at kostnadsramme for attståande arbeid kan innarbeidast i komande budsjett og økonomiplan.

Redd for presedens

Gaute Lund (SF) var litt redd for kva presedens eit positivt vedtak kunne skapa.

– Dette skulle vel i utgangspunktet vera eit pådrivarselskap. No verkar det som at AS-et har blitt eit utbyggjarselskap, og at dei er i gang med prosjekteringa. Selskapet treng mykje meir pengar enn eg hadde sett for meg. Men det er godt mogleg det er fornuftig å gjera det på denne måten, filosoferte han.

Øyvind Utne (H) tykte det var heilt relevante spørsmål Lund stilte, men ville likevel gå for innstillinga.

– Høgre heiar på alle gode krefter som jobbar for å få realisert dette prosjektet, sa han.

Også Hans Inge Myrvold (Sp) støtta innstillinga, og understreka at om ein skal nå fram hjå offentlege mynde, så må ein kunne presentera ein reguleringsplan.

– Det hastar med å få lagt fram ein heilskapleg reguleringsplan. Den må på bordet i løpet av veldig kort tid, vurderte han.

Innstillinga vart dermed samrøystes vedteke.