Redda ned frå fjellet

Fredag vart det sett i gang leiteaksjon ved Møsevatnet, etter at politiet fekk inn melding om tre personar som var sakna sidan onsdag.

Eit tysk ektepar i 60-åra og ein norsk turkamerat vart fredag klokka 10.30 meldt sakna til politiet. Dei la onsdag klokka 08.00 ut på det som skulle vera ein dagstur til Svelgabreen. Men på turen gjekk dei seg vill, og vart vandrande i fjellet til fredag klokka 12.45.

Då hadde politiet og frivillige frå SKL tatt seg til Møsevatnet kor dei sakna etter kvart vart funne i forholdsvis god behald. Turkameratane vart frakta til legesenteret for nærare sjekk.

– Dei var kledde for ein dagstur, men var i fjellet i nærare to og ein halv dag. Dei var difor kalde og slitne, og kvinna hadde behov for hjelp for å koma seg ned. Eg vil òg takka dei frivillige frå Sunnhordland kraftlag som var til fantastisk hjelp i leiteaksjonen, seier politibetjent Are Uppheim.