Redd BKK byggjer ned i Kvinnherad
Fleire politikarar fryktar at nyhendet frå BKK/Eviny i kommunestyret slett ikkje er noko gladsak.
Publisert
Sist oppdatert
I fyrste pause etter føredraget til BKK, vart politikarane Alf Jarle Langeland (KrF), Øyvind Hardeland (Ap) og Gunnar Helleland (INP) ståande og diskutera det dei fekk høyra. Dei var alle svært skeptiske til kva som blir realitetane.
– Eg er stygt redd det er skatteinntekter og arbeidsplassar som ryk no, nett som i Mauranger (Statkraft). Der var det 15-20 arbeidsplassar, men no er det ikkje så mange igjen, sa Hardeland.
Annonse
– Konklusjonen er nok at det blir ei nedbygging av kompetansearbeidsplassar i Kvinnherad, vurderte Langeland.
– Eg trur dei er i ferd med å leggja ned i Kvinnherad, og i alle fall flytta ingeniørane. Dei kjem til å ryka, analyserte Helleland.
Øyvind Hardeland understreka at det uansett blir viktig å ha ein god dialog med BKK framover. Men han fryktar at viss fleire arbeidsplassar blir flytta frå Kvinnherad til Bergen, så vil det gå utover lokalkunnskapen ved til dømes straumbrot.
– Då sit dei i Bergen og veit ikkje kvar Herøysundet ligg. Dette er ikkje bra, ikkje tale om, meldte han.
Annonse
I 15 år
Varaordførar Thea Vaage (Ap) har engasjert seg mykje i straum og nett i vervet sitt. Ho opplyste til Grenda at i samband med BKK sitt kjøp av Kvinnherad Energi, så vart det kontraktfesta at dei tilsette skal ha oppmøteplass i Dimmelsvik i 15 år, medan nokon skal møta på Hatlestrand. Det står også at dei tilsette har rett på jobb i BKK i 15 år.
– Er du bekymra for arbeidsplassane?
– Ikkje alle, men nokre av dei er eg bekymra for. At arbeidsplassane skal vera i Kvinnherad, var jo litt av poenget. Eg forstår at dei ynskjer eit større fagleg miljø, men ikkje alle vil bu i ein by, sa ho.
