Reagerer på tomtesak: – Med sånne signal seier vi «nei» til ungdomen
Øyvind Hardeland (Ap) reagerer på at kommunedirektøren ikkje vil gje løyve til deling av ei tomt i Sunndal.
Publisert
Førre torsdag skreiv Grenda om ei sak som nyleg var oppe til handsaming i Forvaltningsutvalet. Politikarane ynskjer å opna for utskiljing av ei tomt på dyrka mark i Sunndal, dette med tanke på bustadbygging. Men kommunedirektøren med støtte frå statsforvaltaren seier nei. I Grenda kommenterte leiar i Forvaltningsutvalet, Øyvind Utne (H), at «medan graset gror, døyr kua».
I Kommunestyret tok Øyvind Hardeland (Ap) opp saka, og sa seg heilt samd med kollegaene i Forvaltningsutvalet.
Annonse
– Eg er frustrert og skuffa. Vi har eit mål om å bli 15.000 menneske i Kvinnherad, men så les eg i avisa at i Sunndal får dei ikkje lov til å byggja eit hus, og at vi sender saka til Statsforvaltaren. Då tenkjer eg «kva er dette for noko». Vi skal seia «ja» til ungdomane, meinte han.
Kvar einaste sjel
Hardeland reagerte også på argumentet om å ta vare på dyrka mark, og viste til at Statsforvaltaren skal ha sagt ja til 80.000 mål på Jæren, Austlandet og i Trøndelag.
– Det er den flottaste dyrka marka som er, og så skal vi på ein måte stoppe dette her. Når vi gjev sånne signal, så seier vi «nei» til ungdomen. Sunndal treng kvar einaste sjel som vil busetja seg der med familien sin. Så no håpar eg kommunedirektør; vi må ha dåke på lag, vi må bli ein JA-kommune, analyserte han.
Annonse
– Viss vi sender dette til Statsforvaltaren, då slit eg, avslutta Øyvind Hardeland.
