Reagerer på nødbluss på nyttårsaftan

– Det kunne gått gale. At raketten trefte taket der han gjorde, førte til at han spratt 6-7 meter frå fjøsveggen. Raketten heldt fram å brenna etter han landa, og det fatna i litt lauv som han landa ved. Det var så nært bygningen at eg sprang til og kasta noko snø frå ein liten haug som låg ved på blusset, fortel Skåle til Grenda.

Brann ved hus

Underteikna såg ved sjølvsyn blusset som lyste opp det søraustlege hjørna av låven til Skåle. Det var ikkje det einaste som landa nær bygg. Det første blusset som segla gjennom nattehimmelen i Rosendal landa i Rosendal Hamn, både nær småbåtar og flytebrygge i tre.

Eit anna landa i eit lauvtre tett på barnehagen, der det hang og brann i halvt minutts tid før flammane ebba ut. Enno eit bluss landa eit par meter frå seksmannsbustaden nedanfor barnehagen, og heldt fram med å brenna ditto lenge.

– Me er alltid ute på bakkane på nyårsaftan og ser på rakettane. Derifrå har me utsikt til rakettane som blir sendt opp frå stader i Rosendal, samtidig som me ser det som skjer på rakettsida på Seimsfoss og Dimmelsvik. Difor var me nære då nødblusset landa. Det small godt i taket. Sidan raketten spratt langt av garde, så har det vore fart i han, meiner Skåle.

Merket på taket tyder også på det.

Sløkte med vatn

Etter den første innsatsen med snøen, sprang han for å henta vatn for å sløkka.

– Eg måtte innomhus for å finna det, og henta ut tre bøtter totalt og tømte på blusset, forklarer Skåle.

Med 100 sauer i fjøset var det ikkje særleg stas med eit brennande bluss like utanfor.

– Ein sånn rakett kan gå inn i kva som helst hus. Me har ei gamal kyrkje tett på her, og det kan vera folk der dei landar. Nødbluss brenn med høg temperatur, og er så det har lett for å setja fyr på andre ting også, påpeikar Skåle.

Han vurderte å ringja 110 medan det heile stod på, men slo det frå seg.

– Politi og brannvesen hadde sikkert viktigare ting å ta seg til på nyttårsaftan, og eg kom til at eg ikkje orka alt styret som ville følgd med ei full utrykking. Likevel, slik vinden var denne natta, kunne det lett blese gneistar innunder dører og andre opningar som det er på ein låve. Då hadde det gått gale her. Ein må vera obs og bruka vit! formanar bonden om nødblussbruken.

Politistasjonssjef Sigurd Børve er måteleg begeistra over bruken av nødbluss på nyttårsaftan.

– Bruk av det utover å melda om nød er ikkje lovleg. Det misbruker heile formålet med nødbluss. Eg må berre gjenta at dette: Bruk vit! er den tydelege kommentaren frå den lokale politileiinga til Grenda.