Reagerer på digitalt møte

– Me hadde gruppemøte måndag kveld, og fleire i gruppa reagerte på at ein samtidig som ein har ein pressekonferanse der ein oppmodar til normalisert kvardag, kallar inn til kommunestyremøte på Teams. Folk forstår det ikkje, og blir utrygge på korleis det skal tolkast. Det er ein dobbelkommunikasjon som me reagerer på, seier Marianne Nordhus til Grenda.

Ho reagerer også på at det blir kommunestyremøte på dagtid to torsdagar på rappen.

– Det er i arbeidstida, og dagmøte har ein ikkje avtalt å ta i bruk enno. Eg opplever det ikkje som noko heldig prosess. Møte klokka 0830 på Husnes kompliserer ting for bøndene, i alle fall. Det er kort varsel å henta inn vikarar eller avløysar. Eg forstår ikkje kvifor det vert gjort på denne måten, og syns ikkje dette er eit særskilt møte når alle andre skal jobba som normalt. Kvifor ikkje utsetja alt ei veke? spør Nordhus.

Manglar lokale

Ordførar Hilde Enstad har svara på kritikken klare når Grenda spør etter grunngjeving for digitalt møte og to kommunestyremøte på åtte dagar.

– Me ønskte å ha eit fysisk møte på denne torsdagen, men det er ikkje lokale til oss. Alternativa er samfunnshuset i Rosendal eller Festsalen på Husnes, og begge stadane føregår det vaksinasjon no, og i desse tidene får det prioritet. Me tar kommuneoverlegen på ordet om å ikkje miksa innbyggjarar mellom bygdene, svarer ho.

Ho argumenterer med at kommunestyresalen blir for liten til å sikra naudsynt avstand mellom møtedeltakarane, og påpeikar at det ikkje berre er 35 representantar som skal ha plass, men også kommunedirektøren, politisk sekretær, fleire andre frå administrasjonen til å svara på spørsmål, samt pressa.

– På det første møtet tar dei sakene som kan takast på Teams. Deretter kallar me inn kommunestyret til å ta handsaming av budsjettet neste torsdag. Me vart i fjor samde om at budsjettmøta må vera fysiske møte. Difor gjer me det slik, forklarer ordføraren.

Tidspress

Møtet 2. desember er sett opp tidleg, klokka 0830 i Festsalen i kulturhuset på Husnes.

– Det er fordi vaksineringa byrjar klokka 1430, så me må vera ferdige til det. Vaksineringa går føre alt. Me deler møtet i to fordi me ikkje trur me rekk alt, samt avvikla formannskapsmøtet innan 1430, kommenterer ho, og legg til at det er ingen som har tatt kontakt med ho eller kommunedirektøren med spørsmål om møteavviklinga.

– Korleis går arbeidet med budsjettet?

– Me jobbar med det, og har hatt fleire møte. No får me litt ekstra tid, og skal ha fellesmøte for partia og gå gjennom det ein er komne fram til. Målet er å landa noko på måndag, og så ser me kven som syns dette er til å leva med. Det viktige er at alle parti skal kjenna at dei oppnår noko med å vera med på dette samarbeidet.

– Kan ikkje det bli veldig kostbart?

– Me har ikkje summert alt enno. Alle kan ikkje få alle ønskene sine oppfylt, men alle skal få noko, det er målet, sluttar Hilde Enstad.