Reagerer på at 17-åringar kan få køyra lastebil: – Løysinga ligg ikkje i å senka aldersgrensa

EU-parlamentet har nyleg vedtatt å opna for at ungdom ned til 17 år kan køyra tunge køyretøy under oppsyn av ein erfaren sjåfør, med moglegheit for å køyra åleine frå dei er fylte 18 år.

Forslaget kjem som eit forsøk på å få bukt på sjåførmangelen i Europa. Det har møtt stor motstand frå Yrkestrafikkforbundet (YTF), som i ei pressemelding skriv at dei fryktar at senkinga kan få store konsekvensar, og åtvårar norske myndigheiter mot å følga EU i spørsmålet.

«Sjølv om dette regelverket i utgangspunktet gjeld EU-land, kan slike vedtak påverka også norske reglar. YTF er skeptiske til om så unge sjåførar er modne nok til handtera tunge køyretøy», skriv dei mellom anna.

Forbundsleiar Jim Klungnes peikar på at lastebilkøyring ikkje berre handlar om tekniske ferdigheiter, men òg om erfaring og dømmekraft i krevande trafikksituasjonar.

– Sjåførmangel er ei utfordring vi må ta på alvor, men løysinga ligg ikkje i å senka aldersgrensa. I staden må vi retta innsatsen mot å gjera yrket meir attraktivt gjennom betre løns- og arbeidsvilkår, tryggare arbeidsmiljø og ei styrking av utdanningsløpa, påpeikar Klungnes.

Langsiktige løysingar

YTF anerkjenner utfordringane med sjåførmangel både i Norge og Europa, men peikar i pressemeldinga på andre tiltak som kan gjera yrket meir attraktivt for vaksne og erfarne sjåførar.

Mellom anna meiner dei konkurransedyktig løn og trygge arbeidstilhøve, betre tilrettelagt arbeidstid, betre utdanning og betre infrastruktur alle er tiltak som kan hjelpa på mangel på folk i bransjen.

I eit brev YTF nyleg sende til samferdsleminister Jon-Ivar Nygård, anbefalar forbundet at Norge held på dagens aldersgrense på 21 år.

– Vi må ikkje la kortsiktige løysingar på sjåførmangel gå på kostnad av trafikktryggleik. Yrkessjåførar har eit stort ansvar, og dette ansvaret krev både modenheit og erfaring, avsluttar Klungnes.