Reagerer kraftig på ferjesaka

– Det vert mindre attraktivt å bu i Kvinnherad kommune dersom ein kuttar ned ferjeanløpa, som kan føra til at ungdomane som bur her no, i framtida vil flytta ut av kommunen og ikkje flytta tilbake.

Dette skriv Frøya Sverresdotter Hatteberg på vegne av Ungdomsrådet i eit ope brev til fylkesdirektør Rune Haugsdal. Administrasjonen i Vestland fylke har føreslege å redusera tilbodet til berre éi ferje, både mellom Ranavik-Skjersholmane og Årsnes-Varaldsøy-Gjermundshamn. I brevet vert det forklart tydeleg kva konkrete konsekvensar dei føreslegne kutta i ferjetilbodet vil føra til for innbyggarane våre.

Kan driva folk ut av kommunen

Ungdomsrådet nemner pendlarar som ei gruppe som vil tapa på dette, sidan nedskjeringane vil gjera det vanskeleg å koma seg til og frå skule og jobb på same dag.

– Det kan føra til lange dagar som kan driva dei til å flytta ut av kommunen, konkluderer Hatteberg.

Som representantar for ungdomane i kommunen, passar rådet på å forklara kor avhengige alle klubbar, lag og organisasjonar er av ferjene. Dei påpeikar at dei sosiale tilboda for unge kvinnheringar vil bli svekka, sidan idrettslag treng å koma seg fram til kampar og arrangement, og å koma seg heim i rimeleg tid.

Vanskeleg for lag og organisasjonar

– Det vert òg vanskelegare for klubbar, lag og organisasjonar som kjem for å besøka oss, forklarar Hatteberg.

Brevet peikar også på at det truleg vert kapasitetsproblem på populære avgangar, dersom det berre er éi ferje som skal handtera trafikken. Dei fryktar at ikkje alle vil få plass på ferja, og dermed ikkje kjem seg til Kvinnherad. Brevet vert avslutta med følgjande oppmoding:

– Ungdomsrådet ber om at forslaget om å redusera i ferjetilbodet ikkje vert tatt til følgje.