Raudt vil bruka etter Robin Hood-prinsippet

Førstekandidat på Stortingslista for Raudt i Hordaland Sofie Marhaug var torsdag i Kvinnherad saman med Gaute Lund, som står på 12. plass på same lista. På programmet stod besøk på Valen sjukehus, samt eit møte i med Fagforbundet i deira kontor.

Ved sistnemnde lokasjon vart Marhaug og Lund møtt av leiar May Britt Bekvik Bendiksen og nestleiar Jorunn Bakke Handeland.

Ettersom Bakke Handeland er tilsett ved Akasia barnehage på Valen, var avprivatisering av barnehagane ei sak tidleg i samtalen. Kvinnherad kommune har vurdert å kjøpa tilbake barnehagen på Valen, noko Lund oppdaterte Marhaug om.

– Me (politikarane i kommunestyret, journ.merk) har utstyrt ordførar og kommunedirektøren med fullmakter til å forhandla om denne barnehagen, utfylte Lund.

– Me tilsette ynskjer å bli kommunale igjen. Det er mykje krøll, der det meste handlar om pensjon. Barnehagen er lagt ut til sals for 50 millionar, noko er fantasipris, spesielt med tanke på at Aksia i Bergen har gitt sine til Bergen kommune, mot at dei overtok gjelda. Kommunane betaler veldig mykje i tilskot til private barnehagar, argumenterte Bakke Handeland.

Marhaug trekte parallellar til situasjonen i Bergen, men også andre stader i landet.

– Velferdsprofitørane undergrev velferdsstaten reint politisk når skattepengar kan hamna hos desse profitørane, sa Marhaug og gjorde tydeleg klart at ho og Raudt syns desse midlane skal koma andre til gode.

Velferdsprofitørar

Bekvik Bendiksen formidla uro om skulebudsjetta frå fleire av sine medlemmer.

– Det er ikkje overføringar som følgjer med skulane, når ein ikkje vil endra i strukturen, sa ho. Dette førte samtalen over til spørsmålet om heiltids- og deltidsstillingar i helsevesenet og overføringar til kommunane.

– Å styrka kommuneøkonomien, som gjerne høyrest kjedeleg ut, er eigentleg ei av kjernesakene til Raudt, og det er kampen mot forskjells-Norge. Eg har sete ti år i bystyret i Bergen, og veit at det er kommunane som leverer desse velferdstenestene som utjamnar forskjellane i barnehage, skulane, sjukeheimar, barnevern, understreka Marhaug.

– Ein gjer det i alle dei tenestene som bidrar til at me har ein velferdsstat der me tar vare på dei som treng det mest, utan at dei må gå med hua i handa. Viss eg kjem på Stortinget, så er mitt fremste ønske å sitja i kommunalkomiteen, for det er ein av dei viktigaste, syns eg. Ein treng større overføringar frå staten for å få dette til å gå i hop for dei tilsette, gjorde ho klart.

– Når du tyner kommune-Norge, så tyner du både dei som skal motta tenestene, og du lager ein lågtløna klasse, supplerte Lund.

– Kor skal desse pengane koma frå?

– Det er ikkje slik at me har pengar andre ikkje har. Me vil auka skattane med 48 milliardar i løpet av dei neste fire åra. Dei med årsløn under 600.000 skal få lågare skatt, og så aukar me skattetrykket gradvis. Dagens regjering har gitt 37 milliardar i skattelette til dei rikaste, årleg, så me har råd til dette, hevda Marhaug, og meinte sjølv at finansieringa skulle gjerast etter Robin Hood-prinsippet, ta frå dei rikaste og gje til dei fattigaste.

Marhaug meinte ein gjerne kunne bruka oljefondet på samferdsle, i staden for aksjespekulasjon, og at det står ikkje i konflikt å ha gode helsetenester og gjera ein klimainnsats.

12. kandidaten på lista syns det var kjekt med besøk frå listetoppen.

– Det er veldig bra at byfolka får koma seg ut i distriktet også. Å møta folk flest er ein ting, det andre er å møta organisasjonar og fagrørsla, det tredje er å vitja verksemder som Valen sjukehus og Hydro Husnes. Det har vore vår prioritering no i valkampen, sluttar Lund.