Raudhette og ulven kjem til Husnes Kulturhus
7. desember kan du sjå teaterstykket om «Raudhette og ulven» i Husnes Kulturhus. – Både ti-, tretti- og sekstiåringen kosar seg med dei sprelske ablegøyene på scena. Ta med deg heile familien til eventyrland, skriv Teater Vestland.
Publisert
Onsdag 7. desember kjem Teater Vestland og held teaterstykket om «Raudhette og ulven» i Husnes Kulturhus. Arrangøren skriv følgjande om handlinga av den godt kjente forteljinga:
– Heilt åleine må ho gå den lange vegen gjennom skogen med mat til bestemora som er blitt for gammal og skrøpeleg til å ta vare på seg sjølv. Ho må love å ikkje gå av stien, og ho må ikkje snakke med framande, men på vegen møter ho ulven som lurer henne til å tru at han er like glad i blomar som ho. Er ulven berre slem, eller slit han kanskje med sine eigne ting?, står det å lesa på Teater Vestland si nettside.
Annonse
For alle generasjonar
Deira versjon av eventyret, som dei kallar millenniumsversjonen, er utvikla gjennom leik og improvisasjon i teatersalen.
– I vår versjon av det urgamle eventyr er det masse gøy og musikk. Skodespelarane dukkar opp med mange forskjellige instrument, og det er fullt band på scena. Scenografien består av ein heil skog, og bestemor bur i ei campingvogn som er litt magisk, skriv dei.
Vidare meiner Teater Vestland at framsyninga går heim hos alle generasjonar.
Annonse
– Både ti-, tretti- og sekstiåringen kosar seg med dei sprelske ablegøyene på scena. Ta med deg heile familien til eventyrland, lokkar Teater Vestland.
