Rår til å byggja Kvinnherad Arena med kraftlagspengar

Kommunedirektøren går inn for å byggja Kvinnherad Arena, og fyller opp den manglande finansieringa med pengar frå salet av Fjelberg Kraftlag.

– Ei heilskapleg vurdering syner at ulempa med å avlysa er større enn å inngå kontrakt, og kommunedirektøren vil anbefale å gå for realisering av Kvinnherad Arena med dagens prosjekt. Utsetjing av bygging og ny konkurranse kan føra til at ferdigstilling av ny idrettshall på Husnes ligg nokre år fram i tid. I verste fall kan hende fem år fram i tid. Ved å inngå kontrakt no vil me ha ein ferdig hall i løpet av sommaren 2023, skriv kommunedirektøren i saksutgreiinga om Kvinnherad Arena.

18,8 millionar ekstra

I innstilling frå kommunedirektøren til kommunestyret ligg det inne å vedta ein ny kalkyle på 134,5 millionar kroner (eks. mva.). I tillegg til tidlegare løyvde kommunale midlar, og ekstra kommunal løyving i av 7 millionar kroner i omfordelte midlar, innstiller kommunedirektøren på å løyva ytterlegare 8,8 millionar kroner (eks. mva.).

Manglande finansiering er etter dette kalkulert til 10 millionar (eks. mva.). Kommunedirektøren og styringsgruppa skal arbeida vidare med å skaffa auka ekstern

finansiering på tilsvarande sum, eit beløp som kommunestyret forskotterer.

– Totalsummen 18,8 millionar kroner (eks. mva) skal finansierast ved bruk av oppgjer etter sal av Fjellberg Kraftlag. Auka finansiering og forskottering vert å innarbeida i budsjettrevisjonen for 2021, innstiller Kommunedirektøren, som også ber om fullmakt til å inngå kontrakt med Leigland Bygg AS om bygginga av Kvinnherad Arena.

Avlysing

Då kommunen gjennomførte anbodskonkurranse på Kvinnherad Arena var kalkylen 143 millionar kroner (inkl. mva.), medan beste tilbodet som kom inn var på 181 millionar kroner (inkl. mva.). Parallelt vart 10 millionar av finansieringsplanen tatt ut, då eit bidrag frå SKL ikkje lenger kunne reknast inn i prosjektet.

– Styringsgruppa for Kvinnherad Arena har i perioden etter anbodskonkurransen jobba med kostnadssida og søkt å finna reduksjonar her. Det er vurdert å auka den kommunale delen av finansieringa, og det er søkt meir ekstern finansiering, skriv kommunedirektøren.

Ho legg til at dei vurderer vidare moglegheit for realisering av prosjektet, sett opp mot ei eventuell avlysing av konkurransen og å eventuelt starta på nytt med planlegging av ein arena i ein mindre skala.

– Dersom ein vel å avlysa konkurransen, vil dette gje moglegheit for å skalera ned prosjektet og vurdera ei anna finansiering, med mindre grad av kommunale midlar og mindre låneopptak. Dette vil kunne redusera lånegjelda til Kvinnherad kommune. Det er likevel ingen openberre forhold som tyder på at ei avlysing vil føra med seg lågare kostnader, og heller ingen sikkerheit knytt til om eksterne finansieringsbidrag vil følgje eit eventuelt neste prosjekt, vurderer administrasjonen i saksutgreiinga.

Leigland bygg sitt tilbod vert vurdert til å vera eit godt tilbod og ei eventuell avlysing av konkurransen gjev liten garanti for at prosjektet kjem betre ut økonomisk i neste runde.