Rapport frå uvêret
Innbyggjarane i Mauranger var avstengte frå omverda frå søndag kveld og gjennom heile måndagen. Knut-Inge Øvrehus i Austrepollen meiner vegstenginga viser at det må byggjast lang tunell mellom Pollane.
Publisert
Sist oppdatert
– Det er verst for dei som skal på jobb eller skule, seier Knut-Inge Øvrehus når Grenda snakkar med han i 14-tida måndag.
For medan ingen av sambygdingane i Mauranger kom seg på jobb eller skule i Odda, Jondal eller Rosendal, var han sjølv heldigare. Øvrehus jobbar nemleg på Lerøy Sjøtroll sitt oppdrettsanlegg ved Tveitnes.
Annonse
– Men anlegget er stengt for brakklegging no, så eg har permisjon. Uansett betyr ikkje vegstenging så mykje for meg, for eg plar bruka båt på jobb, seier han.
– Korleis er det med maten då? Har de nok i huset?
– Ja, det går fint. Vi har nett laga 150 kilo hjortepølse, så vi klarer oss heilt til våren, humrar han.
Øvrehus opplyser at det helst er sjeldan at vegen er stengt inn til Odda. For strekninga mellom Austrepollen og Nordrepollen stiller det seg derimot heilt annleis.
Annonse
– Det er vel ein av dei mest stengte vegane i Norge, seier han.
Tenkja langsiktig
Knut-Inge Øvrehus eig ein flokk utegåande kyr, som traskar rundt på bakkane i området mellom Folgefonntunnelen og der bomstasjonen tidlegare stod. I fjellsida ovanfor heng den berykta Øspelundskavelen. Den er ein av grunnane til at fylkeskommunen valde å stenga Folgefonntunnelen no.
– Det er litt skummelt med Øspelundskavelen. Den kom ned kring 2011, og gjekk då heilt til elva. Det er mykje snø i skavlen no, men det er vanskeleg å seia når den kjem ned, fortel han etter å ha sett til kyrne tidlegare på dagen.
Knut-Inge Øvrehus meiner rasfaren i dette området er eit argument for at den komande tunellen mellom Austrepollen og Nordrepollen bør byggjast i samsvar med det lengste alternativet.
– Eg meiner heilt klart det. Ein bør tenkja langsiktig her, for trafikken aukar heile tida. Spesielt om sommaren kan det vera lange køar. Viss ein har litt peiling på vegar, så ser ein at det er meiningslaust å greia ut alle desse alternativa. Eine alternativet er å ha tunellopninga nede ved sjøen, men der er det veldig rasutsett, spesielt slik det er no. Litt oppe i fjellet er det sikkert 1 meter med snø, og så har det kome mykje regn i tillegg, analyserer han.
Annonse
Ladestasjon
Øvrehus kjem samstundes med ei oppmoding til Kvinnherad kommune.
– Kommunen bør koma på banen slik at det blir bygd eit skikkeleg kryss mellom Folgefonntunnelen og den nye tunellen. Der må ein setja opp eit godt informasjonsskilt om kva som finst i Kvinnherad. Gjerne bør det koma ladestasjon og bensinstasjon også, kanskje også ein daglegvarebutikk. Skal vi få turistane til å velja Kvinnherad, så må ein gjera noko for å få dei til å stoppa der, elles køyrer dei berre vidare til Bergen, seier han.
